Vazirlik huzuridagi dori vositalari ekspertizasi bo‘yicha korxonaning yangi rahbariga tizimda korrupsiyaga barham berish vazifasi yuklatilgan.
Mirzohidjon Muxtorovich Qodirov Sog‘liqni saqlash vazirligi huzuridagi «Dori vositalari, tibbiy buyumlar va tibbiy texnika ekspertizasi va standartlashtirish Davlat markazi» davlat unitar korxonasi direktori vazifasini bajaruvchi etib tayinlandi.
M. Qodirov 2003 yilda Toshkent farmatsevtika institutini tamomlab, ish faoliyatini mazkur oliy o‘quv yurtida kafedra assistenti sifatida boshlagan.
Keyinchalik Dori vositalari va tibbiy texnika sifatini nazorat qilish bosh boshqarmasi Farmakopeya qo‘mitasida yetakchi mutaxassis, qo‘mita raisi o‘rinbosari, Farmatsevtika tarmog‘ini rivojlantirish agentligi «Dori vositalari, tibbiy buyumlar va tibbiy texnika ekspertizasi va standartlashtirish Davlat markazi» DUK direktori kabi mas’ul lavozimlarda ishlagan.
«M. Qodirovga tizimda korrupsiyaga barham berish, sohaga xalqaro standartlar, yuqori texnologiyali laboratoriyalarni joriy qilib, O‘zbekistonga sifatli dori vositalari, tibbiy buyumlar va tibbiy texnikalar kirib kelishini ta’minlash, mamlakatda farmatsiya sohasini yangi bosqichga olib chiqish, markazda faoliyat ko‘rsatuvchi kadrlar malakasini jahon talablari darajasida oshirib borish hamda o‘z ishiga halol hamda vijdonan yondashadigan bilimli va mahoratli mutaxassislardan iborat jamoani shakllantirish kabi muhim vazifalar yuklatildi», deyiladi SSV matbuot xizmati xabarida.
Shuningdek, sog‘liqni saqlash vazirining tegishli buyrug‘i bilan Sanjar To‘raqulovich Nabiyev vazirlik muassisligidagi IT-Med mas’uliyati cheklangan jamiyati direktori etib tayinlandi.
S.Nabiyev 2016 yilda Buyuk Britaniyadagi London shahar universiteti (City University of London)ning bakalavriat, 2018 yilda esa Ispaniyadagi Les Roches Marbella mehmonxona boshqaruvi xalqaro maktabining magistratura bosqichini axborot texnologiyalari hamda menejment yo‘nalishlari bo‘yicha tamomlagan.
Mehnat faoliyatini Toshkent shahridagi Academ Food mas’uliyati cheklangan jamiyatida menejyer vazifasida boshlab, keyinchalik Londondagi NanoProtech Ltd kompaniyasi, Toshkentdagi GPM Realty, Blue Bell Global Venture hamda Blue Bell Global Venture xususiy korxonalarida mas’ul lavozimlarda ishlagan.
Sog‘liqni saqlash vazirining tegishli buyrug‘i bilan Farrux Abduqahhorovich G‘afforov vazirlikning Davlat-xususiy sheriklikni rivojlantirish boshqarmasi boshlig‘i vazifasini bajaruvchi etib tayinlandi.
1979 yilda tug‘ilgan F.G‘afforov xorijiy tillar, shuningdek, moliya va investitsiyalarni boshqarish bo‘yicha mutaxassislikka ega.
U o‘z faoliyati davomida Toshkent shahridagi bir qator tumanlarning G‘aznachilik bo‘linmalari, «Asakabank» va Xalq banki kabi yetakchi moliya muassasalari, shuningdek, Moliya vazirligi huzuridagi Davlat-xususiy sheriklikni rivojlantirish agentligida turli mas’ul lavozimlarda ish olib borgan.
