Tashqi ishlar vazirining birinchi o‘rinbosari elchi qilib jo‘natiladi

Telegram’dagi «Nigoh» kanali manbalariga tayanib xabar berishicha, vazir o‘rinbosari Farhod Arziyev vakant bo‘lib turgan O‘zbekistonning Xitoydagi elchisi lavozimiga tayinlanadi. Xitoy tashqi ishlar vazirligi uning nomzodiga rozilik bergan.

U yanvar oyida Xitoy poytaxti Pekinga jo‘nab ketishi kutilmoqda.

«Tashqi ishlar vazirining birinchi o‘rinbosari lavozimiga kim tayinlanishi haqida hozircha xabar berilmadi», deyiladi xabarda.

O‘zbekistonning Xitoydagi sobiq elchisi Baxtiyor Saidov 17 noyabr kuni Xalq ta’limi vaziri lavozimiga tayinlangan edi.

Farhod Arziyev O‘zbekistonning Germaniyadagi elchixonasida maslahatchi sifatida ishlagan, 2017 yilning mayidan O‘zbekistonning Hindistondagi favqulodda va muxtor elchisi bo‘lgan, 2020 yil fevralida Tashqi ishlar vazirining birinchi o‘rinbosari lavozimiga tayinlangandi.