Elchi Xalq ta'limi vazirligining yangi rahbari bo‘ladi

Oliy Majlis Qonunchilik palatasining 17 noyabrdagi yalpi yig‘ilishida hukumatning ikki a'zosi nomzodi ko‘rib chiqildi. 

«Ma'lumki, amaldagi qonun hujjatlariga binoan, Vazirlar Mahkamasi a'zolari, vazirlar lavozimga tayinlanishidan avval ularning nomzodi Oliy Majlis Qonunchilik palatasida deputatlar tomonidan ko‘rib chiqiladi.

2021 yil 17 noyabr kuni Oliy Majlis Qonunchilik palatasining navbatdagi majlisi bo‘lib o‘tdi. 

Unda deputatlar Axborot texnologiyalari va kommunikatsiyalarini rivojlantirish vaziri lavozimiga Sherzod Shermatov nomzodini hamda Xalq ta'limi vaziri lavozimiga Baxtiyor Saidov nomzodini ko‘rib chiqdilar va ma'qulladilar», deyiladi Qonunchilik palatasi matbuot xizmati xabarida.

Baxtiyor Saidov 1981 yilda Samarqand viloyatida tug‘ilgan, 2002 yilda Toshkent davlat iqtisodiyot universitetini tamomlagan.

U 2016 yil yanvaridan «O‘zbekengilsanoat» AJ boshqaruvi raisining birinchi o‘rinbosari — bosh menejyeri bo‘lgan.

2017 yil iyulida O‘zbekistonning Xitoy Xalq Respublikasidagi diplomatik missiyasi rahbari etib tayinlangan. U 2018 yil aprelidan Mo‘g‘uliston, 2019 yil iyulidan Filippindagi (qarorgohi Pekinda joylashgan) elchi vazifasini ham bajarib kelayotgandi.

Bundan avvalroq Xalq ta'limi vazirligiga 2018 yil iyunidan buyon rahbarlik qilib kelgan Sherzod Shermatov Axborot texnologiyalari va kommunikatsiyalarini rivojlantirish vaziri lavozimiga o‘tkazilayotgani xabar qilingandi.