Uyda yakka tartibda ta'lim beradigan o‘qituvchilarning ish haqi 40 foizgacha oshiriladi

O‘quvchilarga uyda yakka tartibda ta'lim berayotgan o‘qituvchilar ish haqlarini hisoblash metodikasini tasdiqlash bo‘yicha xalq ta'limi vaziri va moliya vazirining qo‘shma qarori qabul qilindi. Bu haqda Xalq ta'limi vazirligi matbuot xizmati Kun.uz'ga ma'lum qildi.

Qarorga asosan, nogironligi bo‘lgan o‘quvchilarga uyda yakka tartibda ta'lim berayotgan o‘qituvchilarning ish haqlarini hisoblashning yangi metodikasi joriy etilmoqda.

Umumta'lim muassasalarida o‘quvchilarga uyda yakka tartibda ta'lim berayotgan o‘qituvchilarga endilikda amaldagi oylik ish haqi miqdorlarini 40 foizgacha oshirilgan holda to‘lash imkoniyati yaratiladi.

Bundan tashqari, mazkur o‘qituvchilarga o‘quvchilar ta'tilda bo‘lgan davrda ham ish haqi to‘lab berilishi hamda yillik mehnat ta'tili pullari to‘lanishi belgilandi.