«Qimor qachondan ochiqchasiga reklama qilinadigan bo‘lib qoldi?» - Andijon va Xo‘jaobod markazidagi totalizatorchilarga chora ko‘rish so‘ralmoqda

«Biz Xo‘jaobod tumanidan murojaat qilyapmiz. Hozirgi kunda yoshlarimiz o‘rtasida totalizator o‘yinlariga qiziqish oshib boryapti. Buning orqasidan oilalarda juda ko‘p ko‘ngilsiz holatlar ham ro‘y bermoqda. Yoshlar o‘qib-o‘rganib, mehnat qilish o‘rniga qimor o‘ynab bir zumda boyib ketish, turmushi qo‘qqis yaxshilanib ketishini orzu qilayotgani bizni xavotirga solyapti.

Afsuski, Xo‘jaobod tumani markazidagi buyum bozori va dehqon bozori o‘rtasida ana shunday totalizator o‘yinini targ‘ib qilib, yoshlarga uni qanday o‘ynashni o‘rgatadigan do‘kon faoliyat yuritib kelmoqda.

1xbet reklamasi tasvirlari tushirilgan bu do‘kon yosh va qiziqqon avlodni o‘ziga ohanrabodek tortayotgani bizni xavotirga solyapti.

Axir O‘zbekistonda qimor va tavakkalchilikka asoslangan o‘yinlarni targ‘ib qilish taqiqlangan emasmi? Qimor qachondan ochiq-oydin reklama qilinadigan bo‘lib qoldi?

Yana Andijon shahrining qoq markazida Bobur shohko‘chasida ham xuddi shunday reklamalar ilingan do‘konni ko‘rdik», – deydi Kun.uz'ga murojaat qilgan bir guruh fuqarolar.

Vazirlar Mahkamasining 2007 yil 16 avgustdagi 176-sonli qaroriga asosan, 2007 yil 1 sentyabrdan boshlab O‘zbekiston hududida qimor o‘yinlarini va tavakkalchilikka asoslangan boshqa o‘yinlarni (shu jumladan totalizatorlar) tashkil etish va o‘tkazish taqiqlangan.

Biroq, «O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida»gi 2019 yil 4 dekabrdagi prezident farmonida, sport sohasini, ayniqsa, futbolni yanada rivojlantirish, uning investitsiyaviy jozibadorligini oshirish, qo‘shimcha mablag‘larni jalb qilish maqsadida 2021 yil 1 yanvardan boshlab O‘zbekistonda bukmekerlik faoliyatini amalga oshirishga ruxsat berilgan.

Farmonda, bukmekerlar daromadidan bir qismini futbolni rivojlantirish uchun ajratish lozimligi va ushbu mexanizmni yo‘lga qo‘yish bo‘yicha hukumat qarori qabul qilinishi nazarda tutilgandi.

Ushbu mexanizmni belgilovchi Hukumat qarori hozircha qabul qilinmaganini inobatga olsak, hozircha O‘zbekistonda bukmekerlik bilan shug‘ullanish uchun huquqiy asoslar yetarli emas, ya'ni ushbu faoliyat noqonuniy hisoblanadi.

Shu tufayli Andijon viloyatida bukmekerlik faoliyatini yo‘lga qo‘ygan shaxslar aniqlanib, ularga javobgarlik qo‘llanishi lozim, deb hisoblaymiz.

Ma'lumot uchun, Ma'muriy javobgarlik to‘g‘risidagi kodeksning 191-moddasida, O‘zbekiston Respublikasida qimor va tavakkalchilikka asoslangan boshqa o‘yinlarni tashkil etish yoxud voyaga yetmagan shaxsni ushbu o‘yinlarda ishtirok etishga jalb qilganlik uchun ma'muriy, Jinoyat kodeksining 278-moddasida qimor va tavakkalchilikka asoslangan boshqa o‘yinlarni qonunga xilof ravishda tashkil etish yoki o‘tkazish, shu jumladan ana shunday o‘yinlar uchun qimorxonalar tashkil etish yoki ularni saqlash jinoiy javobgarlikka sabab bo‘lishi belgilangan.

Avvalroq, Kun.uz saytida yoshlar orasida kasb-hunar egallash, bilim olishga sarf qilinishi kerak bo‘lgan pul, energiya va vaqt keraksiz hamda zararli «qimor» o‘yini (bukmekerlik o‘yinlari) uchun sarflanayotgani, unda ishtirok etayotganlar mablag‘larini asossiz tarzda yo‘qotayotgani va bu oxir-oqibat moliyaviy qiyinchiliklar sabab odamlar orasida huquqbuzarlik va jinoyatlar ko‘payishiga olib kelishi haqida so‘z yuritilgandi.

Elmurod Ermatov