15 yanvarda 1-Respublika Qur'oni Karim tilovati musobaqasi boshlanadi

2018 yil 15 yanvari Qur'oni Karim tilovati bo‘yicha 1-Respublika qorilar ochiq musobaqasi boshlangan kun sifatida tarixga kiradi. Rejaga ko‘ra, Qur'on musobaqasining tuman-shahar bosqichi ochilish marosimi Jizzax viloyatining so‘lim Zomin tumanidagi zamonaviy usulda qayta barpo etilgan “Ma'rifatli” jome masjidida bo‘lib o‘tadi. 

Shu bilan boshqa hududlarda ham musobaqa boshlanishiga duo beriladi, deb xabar beradi O‘zMI matbuot xizmati. Ushbu marosimda istagan kishi qatnashishi mumkin. 

Ma'lum qilinishicha, ayni vaqtda “Ma'rifatli” jome masjidida musobaqaning ochilish marosimiga katta tayyorgarlik ishlari olib borilmoqda. Shu vaqtga qadar  musobaqada qatnashishga jur'at qilgan, ya'ni o‘zining bilimiga, quvvai hofizasiga ishongan 18 yoshdan 40 yoshgacha bo‘lgan qori va qoriyalar soni salkam to‘rt mingga yaqin ekan. Ishtirokchilarning to‘liq va yakuniy ma'lumoti ertaga e'lon qilinishi kutilmoqda. 

Ta'kidlanishicha, musobaqa jarayoni to‘g‘ridan-to‘g‘ri efirga uzatib boriladi. U yerga bora olmagan vatandoshlar musobaqaning ochilish marosimini www.muslim.uz portali va Idoraning ijtimoiy tarmoqlardagi sahifalari orqali onlayn kuzatib borishlari mumkin.

Eslatib o‘tamiz, 2017 yil 1 sentabrda Davlat rahbari Shavkat Mirziyoyev Toshkentdagi Xasti Imom majmuasiga tashrifida O‘zbekistonda Qur'on tilovati bo‘yicha Respublika musobaqasini tashkil etish tashabbusini bildirgan edi.