Shavkat Mirziyoyev O‘zbekiston xalqini Navro‘z bilan tabrikladi

Toshkent shahridagi «Yangi O‘zbekiston» bog‘ida Navro‘z umumxalq bayrami munosabati bilan tantanali marosim boshlandi.

Unda so‘zga chiqqan prezident Shavkat Mirziyoyev butun xalqni, shuningdek, dunyoning turli mamlakatlarida mehnat qilayotgan va tahsil olayotgan vatandoshlarni Navro‘z ayyomi bilan qutladi.

Davlat rahbari o‘z tabrigida bugungi qutlug‘ kun Navro‘z bayrami bilan muborak Ramazon hayiti bir vaqtga to‘g‘ri kelgani alohida ramziy ma’no kasb etishini ta’kidladi.

“Bugun bamisoli ikki azim daryo tutashmoqda – Navro‘z bayramini muborak Ramazon hayiti bilan birga nishonlamoqdamiz”, dedi prezident.

Shavkat Mirziyoyev Navro‘zni tabiatning uyg‘onishi, go‘zallik, yangilanish va ruhiy poklanish timsoli sifatida ta’riflab, ushbu bayram yurtimizga tinchlik, baxt va farovonlik olib kelishini tiladi.

Tantanali marosim Navro‘zning milliy qadriyatlar, bag‘rikenglik va birdamlik ruhini ulug‘lovchi umumxalq bayrami sifatida yuksak ruhda davom etmoqda.