Toshkent viloyatida qator issiqxonalarda filtr o‘rnatilmagani aniqlandi

Bosh prokuratura hamda Ekologiya, atrof-muhitni muhofaza qilish va iqlim o‘zgarishi vazirligi xodimlaridan iborat ishchi guruh Toshkent shahar va viloyatdagi issiqxonalar faoliyatini tekshirish bo‘yicha tungi reydlar o‘tkazmoqda. Qator obektlarda atrof-muhitga zararli tashlamalarga oid qoidalar buzilgani aniqlandi.

Foto: Ekologiya, atrof-muhitni muhofaza qilish va iqlim o‘zgarishi vazirligi

Tekshiruvlar davomida, jumladan, Toshkent viloyati Toshkent tumanidagi «Hasanboy guzari» MFY hamda Qibray tumanidagi «Parvoz» MFY hududida joylashgan issiqxonalar qozonxonalarida filtr o‘rnatilmagani ma’lum bo‘ldi. Bu holatlar atrof-muhitga zararli moddalar chiqarish bilan bog‘liq talablar buzilishi sifatida baholandi.

Aniqlangan qoidabuzarliklar bo‘yicha issiqxonalarga nisbatan Ma’muriy javobgarlik to‘g‘risidagi kodeksning tegishli moddalariga muvofiq ma’muriy bayonnomalar rasmiylashtirildi.