“Uch kishiga tushlik olib keling” – Samarqandda YPX xodimi haydovchidan pora so‘radi

Ijtimoiy tarmoqlarda YPX xodimi va haydovchi o‘rtasidagi suhbat aks etgan videolavha tarqaldi. Unda YPX xodimi haydovchidan uch kishiga tushlik olib kelishni so‘ragan.

YPX xodimi va haydovchi o‘rtasidagi suhbat shunday kechgan:

— Yozmaymi sizga?
— Nimani yozasiz, komandir?
— Ayting-da, yozaymi-yozmaymi?
— A yo‘q.
— Mana shu yerda 50 kundan beri turibman quyoshda, bitta suv ham olib kelmaysiz-ye.
— Suv sizdan aylansin.
— Qorning ochmi, nima qilyapsan demaysiz...
— Suvi qaynab ketdi-da mashinaning, aka.
— Nima qilay, nima qilish kerak, ayting?
— Hech narsa, aka, hammasi yaxshi.
— Hammasi yaxshimi? Xafagarchilik bo‘lmaydimi?

Shundan so‘ng “GAI” xodimi uch kishiga tushlik olib kelishni aytgan. Haydovchi esa bu “taklif” u uchun qiyin ekanini bildirgan. Inspektor esa bunga javoban 100 ming so‘m so‘ragan.

Holatni videoga olib borgan haydovchi suhbatdan biroz o‘tib, YPX xodimidan uzoqlashadi va xodim undan 70 ming so‘m so‘raganini aytadi. Pulni esa oq rangli Nexia-3 mashinasida o‘tirgan odamga beradi.

Samarqand viloyati IIB axborot xizmati rahbari Jahongir Sa’dullayevning Kun.uz'ga ma’lum qilishicha, hozirda videolavhaga aniqlik kiritish maqsadida xizmat tekshiruvi tayinlangan. Holatga huquqiy baho berilib, natijasi bo‘yicha jamoatchilikka ma’lum qilinadi.