Toshkent metrosida yosh bola poyezd yo‘liga tushib ketgani rad etildi

Toshkent metropoliteni ijtimoiy tarmoqlarda yosh bola poyezd yo‘liga itarib yuborilgani aytilgan xabarlarga munosabat bildirdi.

Qayd etilishicha, 26 iyun sanasi soat taxminan 18:00 da metropolitenning «Paxtakor» bekatida harakat tarkibidan tushish chog‘ida yo‘lovchilardan biri (3 yoshli qiz) hamrohining etiborsizligi natijasida vagon eshigiga oyog‘ini qisib olgan. Shundan so‘ng, zudlik bilan unga birinchi yordam ko‘rsatilgan va tez tibbiy yordam xizmati chaqirtirilgan.

Holat yuzasidan yo‘lovchiga hech qanday og‘ir jarohat yetmagan.

«Tarmoqda tarqalayotgan «Yosh bolani itarvorishdi» mazmunidagi xabarlar haqiqatga to‘g‘ri kelmaydi va bu xabarlar yolg‘on ma’lumotdir», — deyiladi munosabatda.

Poytaxt metropoliteni yo‘lovchilaridan harakat vaqtida yosh bolalariga e’tiborli bo‘lishlarini so‘radi.

Shu bilan birga, ijtimoiy tarmoq faollaridan bu kabi o‘z tasdig‘ini topmagan ma’lumotlarni tarqatmaslik, yolg‘on ma’lumot tarqatilgani uchun qonunchilikda javobgarlik borligi eslatib o‘tildi.