102 ga qo‘ng‘iroq qilib, “Trampga chora ko‘rishni” so‘ragan fuqaro ma’muriy jazoga tortildi

Toshkentda 102 ga qo‘ng‘iroq qilib, Donald Tramga chora ko‘rishni so‘ragan fuqaro ma’muriy jazoga tortildi.

Kun.uz tanishgan sud qarorida keltirilishicha, 1988 yilda Andijon viloyatida tug‘ilgan A.K. 6 yanvar kuni mast holatda Toshkent shahar IIBBning 102 raqamiga qo‘ng‘iroq qilgan. U o‘z murojaatida “AQSh prezidenti Donald Trampga chora ko‘rishni” so‘rab, o‘zi Oq uyda yashab kelishi haqida xabar bergan. Internetda tarqalgan audioga ko‘ra, A.K. Donald Trampga Venesuela prezidenti Nikolas Maduroni olib ketgani uchun chora ko‘rishni so‘ragan.   

Huquqbuzar holat bo‘yicha surishtiruv ishlarini olib borish uchun borgan ichki ishlar hodimlarining IIB binosiga borish haqidagi qonuniy talablarini bajarmaganligi ham aniqlangan.

A.K. sudda aybiga iqrorlik bildirgan va o‘sha kuni mast bo‘lganini aytgan.

“102 ga qo‘ng‘iroq qilib, yolg‘on xabar berdim. O‘zim nima deb murojaat qilganimni eslolmayman. Mast holatda edim. Oqibatini tushunmasdan xabar berdim. Ichki ishlar xodimlarining qonuniy talablarini bajardim. Qilgan ishimdan pushaymonman”, degan u sudda.

A.K. kelgusida bunday holatni boshqa takrorlamasligini bildirib, suddan yengilroq jazo tayinlashni so‘ragan. 

JIB Bektemir tuman sudining 2026 yil 7 yanvardagi qarori bilan A.K. Ma’muriy javobgarlik to‘g‘risidagi kodeksning 199-moddasida nazarda tutilgan huquqbuzarlik, ya’ni maxsus xizmatlarni qasddan aldab chaqirganlikda aybli deb topilgan. Unga BHMning 3 baravari – 1 mln 236 ming so‘m jarima jazosi tayinlangan.