Qoraqalpog‘iston va Toshkentda qalbaki dollar o‘tkazmoqchi bo‘lganlar ushlandi

Ma’lum qilinishicha, Yunusobod tumanida o‘tkazilgan tezkor tadbirda fuqarolar Sh.Y. va E.A. qalbaki 9 900 AQSh dollarini 5 000 AQSh dollariga fuqaro A.B.ga sotgan vaqtida ashyoviy dalillar bilan qo‘lga olingan. Tezkor tadbir Departamentning Yunusobod tumani bo‘limi hamda boshqa huquqni muhofaza qiluvchi organlar bilan hamkorlikda amalga oshirilgan.

Shuningdek, Qoraqalpog‘iston Respublikasining To‘rtko‘l tumanida o‘tkazilgan tezkor tadbirda fuqaro A.X. qalbaki 700 AQSh dollarini bank muassasasida ayirboshlash uchun kassaga taqdim qilgan vaqtida ushlangan. Mazkur qalbaki pul ashyoviy dalil sifatida olingan.

Qayd etilishicha, har ikki holat yuzasidan Jinoyat kodeksining tegishli moddalari bilan jinoyat ishlari qo‘zg‘atilgan, hozirda tergov harakatlari olib borilmoqda.

Mutasaddilar fuqarolar va tadbirkorlarni ehtiyotkor bo‘lishga chaqirib, qalbaki valuta qimmatliklarini bilmagan holda qabul qilib, keyinchalik muomalaga chiqarish ham jinoiy javobgarlikka sabab bo‘lishi mumkinligini eslatdi.

Shu bois, o‘zaro hisob-kitoblarni O‘zbekiston hududida qonuniy to‘lov vositasi hisoblangan milliy valutada amalga oshirish tavsiya etildi.