Askarlarga ovqat qilayotgan artistlar va yerto‘ladagi bayram. Ukrainada urushning 26-kuni suratlari

Urushning yigirma oltinchi kuni o‘tdi. Rossiya armiyasi Kiyevni o‘qqa tutishda davom etdi - 21 mart kuni poytaxtning Podolskiy rayonidagi savdo markaziga zarba berildi. RF mudofaa vazirligi u ishlamayotgani va u yerda o‘q-dorilar yashirilgani haqida ma’lum qilgan. Ukraina bosh prokurori ma’lumotiga ko‘ra, savdo markaziga hujum oqibatida sakkiz kishi halok bo‘lgan. Xarkovda rossiyaliklar tomonidan berilgan zarba oqibatida 96 yoshli Boris Romanchenko qurbon bo‘ldi, u nemislarning to‘rtta konslageridan omon chiqqandi.

O‘t o‘chiruvchilar Kiyevdagi Podolskiy rayonida «Retrovil» savdo markazida yong‘inni o‘chirishga harakat qilmoqda. Unga rossiyalik harbiylar hujum qilgan — RF mudofaa vazirligi buni tan olgan. Lokatsiya bo‘yicha ma’lumot urushning ilk kunlarida Ukraina armiyasi texnikasi harakati aks etgan tiktokdagi video orqali aniqlangani taxmin qilinmoqda. Felipe Dana / AP / Scanpix / LETA

Ukrainadagi urushning 26-kunida ro‘y bergan asosiy voqealar:

Rossiya va Ukraina delegatsiyalarining 21 mart kungi muzokaralari bir yarim soat vaqt davom etdi, shundan keyin muzokaralar ishchi guruhlar darajasida olib borildi.
Ukraina prezidenti Vladimir Zelenskiy Ukraina va Rossiya o‘rtasidagi muzokaralarda erishilgan kompromisslar, xususan Ukraina uchun xavfsizlik kafolati yoki Kiyev nazoratida bo‘lmagan Donbassdagi hududlar va Qrimning maqomi Butunukraina referendumiga qo‘yilishi kerakligini aytdi.
Kiyevda raketa zarbasi oqibatida «Retrovil» savdo markazi va atrofdagi bir necha aholi turar joy binolari vayron bo‘lgan. Ukraina tomoni ma’lumotiga ko‘ra, kamida 8 kishi halok bo‘lgan.
Xersonni egallab turgan Rossiya qo‘shini shahar bosib olinishiga qarshi mitingga chiqqan mahalliy aholi vakillarini o‘qqa tutgan, bir necha kishi yaralangan.
Ukraina hukumati Rossiya mudofaa vazirligining Mariupol shahrini topshirish bo‘yicha ultimatumini rad etdi.
Odessadagilar Qora dengizda turgan Rossiya harbiy kemalari birinchi marta shahar atrofidagi aholi turarjoy kvartallarini o‘qqa tutgani haqida xabar berdi.
Ukraina shimoli-g‘arbidagi Rovensk oblastida bir kunda ikki bor raketa zarbalari berildi.
Moskvada Tver sudi Meta kompaniyasi faoliyatini ekstremistik deb tan oldi va uning Rossiyadagi faoliyatini taqiqladi. Meta yirik ijtimoiy tarmoq va messenjerlar - Facebook, Instagram va WhatsApp’ga egalik qiladi, ularning uchinchisiga hozircha Rossiya hukumatida e’tiroz yo‘q.
Urush boshlanganidan buyon Ukrainada 117 bola halok bo‘lgan. Mamlakat bosh prokurorining ma’lumotiga ko‘ra, yana 160 nafarga yaqin bola yaralangan.
Ukraina Favqulodda vaziyatlar bo‘yicha davlat xizmati raisi Roman Primushning ma’lumot berishicha, urush boshidan buyon 651 ta aholi turarjoy binosi butunlay vayron qilingan, 3780 turarjoy binosi qisman shikastlangan.
BBC rus xizmati ochiq manbalarga asoslangan holda Ukrainada halok bo‘lgan 557 nafar rossiyalik harbiylar haqida ma’lumot berdi. Ular orasida 1 nafar general, 8 nafar polkovnik, 9 nafar podpolkovnik, 20 nafar mayor, 71 nafar kichik ofitser borligi ma’lum bo‘lgan. Jurnalistlar OAVda e’lon qilingan, ammo ismlari keltirilmagan harbiylarni, yollanma jangarilarni hamda DXR/LXR ayirmachilarini ushbu ro‘yxatga qo‘shmagan. Faqatgina Rossiya harbiy kontingenti shaxsiy tarkibi ma’lumotlari keltirilgan. Urush boshlangandan beri Rossiya bir marta - 2 mart kuni (urushning 6-kuni) yo‘qotishlari soni 498 nafarligini tan olgandi.