Аскарларга овқат қилаётган артистлар ва ертўладаги байрам. Украинада урушнинг 26-куни суратлари

Урушнинг йигирма олтинчи куни ўтди. Россия армияси Киевни ўққа тутишда давом этди — 21 март куни пойтахтнинг Подольский районидаги савдо марказига зарба берилди. РФ мудофаа вазирлиги у ишламаётгани ва у ерда ўқ-дорилар яширилгани ҳақида маълум қилган. Украина бош прокурори маълумотига кўра, савдо марказига ҳужум оқибатида саккиз киши ҳалок бўлган. Харьковда россияликлар томонидан берилган зарба оқибатида 96 ёшли Борис Романченко қурбон бўлди, у немисларнинг тўртта концлагеридан омон чиққанди.

Ўт ўчирувчилар Киевдаги Подольский районида «Ретровиль» савдо марказида ёнғинни ўчиришга ҳаракат қилмоқда. Унга россиялик ҳарбийлар ҳужум қилган — РФ мудофаа вазирлиги буни тан олган. Локация бўйича маълумот урушнинг илк кунларида Украина армияси техникаси ҳаракати акс этган тиктокдаги видео орқали аниқлангани тахмин қилинмоқда. Felipe Dana / AP / Scanpix / LETA

Украинадаги урушнинг 26-кунида рўй берган асосий воқеалар:

Россия ва Украина делегацияларининг 21 март кунги музокаралари бир ярим соат вақт давом этди, шундан кейин музокаралар ишчи гуруҳлар даражасида олиб борилди.
Украина президенти Владимир Зеленский Украина ва Россия ўртасидаги музокараларда эришилган компромисслар, хусусан Украина учун хавфсизлик кафолати ёки Киев назоратида бўлмаган Донбассдаги ҳудудлар ва Қримнинг мақоми Бутунукраина референдумига қўйилиши кераклигини айтди.
Киевда ракета зарбаси оқибатида «Ретровиль» савдо маркази ва атрофдаги бир неча аҳоли турар жой бинолари вайрон бўлган. Украина томони маълумотига кўра, камида 8 киши ҳалок бўлган.
Херсонни эгаллаб турган Россия қўшини шаҳар босиб олинишига қарши митингга чиққан маҳаллий аҳоли вакилларини ўққа тутган, бир неча киши яраланган.
Украина ҳукумати Россия мудофаа вазирлигининг Мариупол шаҳрини топшириш бўйича ультиматумини рад этди.
Одессадагилар Қора денгизда турган Россия ҳарбий кемалари биринчи марта шаҳар атрофидаги аҳоли тураржой кварталларини ўққа тутгани ҳақида хабар берди.
Украина шимоли-ғарбидаги Ровенск областида бир кунда икки бор ракета зарбалари берилди.
Москвада Твер суди Meta компанияси фаолиятини экстремистик деб тан олди ва унинг Россиядаги фаолиятини тақиқлади. Meta йирик ижтимоий тармоқ ва мессенжерлар - Facebook, Instagram ва WhatsApp’га эгалик қилади, уларнинг учинчисига ҳозирча Россия ҳукуматида эътироз йўқ.
Уруш бошланганидан буён Украинада 117 бола ҳалок бўлган. Мамлакат бош прокурорининг маълумотига кўра, яна 160 нафарга яқин бола яраланган.
Украина Фавқулодда вазиятлар бўйича давлат хизмати раиси Роман Примушнинг маълумот беришича, уруш бошидан буён 651 та аҳоли тураржой биноси бутунлай вайрон қилинган, 3780 тураржой биноси қисман шикастланган.
BBC рус хизмати очиқ манбаларга асосланган ҳолда Украинада ҳалок бўлган 557 нафар россиялик ҳарбийлар ҳақида маълумот берди. Улар орасида 1 нафар генерал, 8 нафар полковник, 9 нафар подполковник, 20 нафар майор, 71 нафар кичик офицер борлиги маълум бўлган. Журналистлар ОАВда эълон қилинган, аммо исмлари келтирилмаган ҳарбийларни, ёлланма жангариларни ҳамда ДХР/ЛХР айирмачиларини ушбу рўйхатга қўшмаган. Фақатгина Россия ҳарбий контингенти шахсий таркиби маълумотлари келтирилган. Уруш бошлангандан бери Россия бир марта - 2 март куни (урушнинг 6-куни) йўқотишлари сони 498 нафарлигини тан олганди.