Lisenziyalash, ruxsat berish va xabardor etish tartibi bitta qonunda bo‘ladi

Qonun hujjatlari ta'sirini baholash tizimi portalida Adliya vazirligi tomonidan tayyorlangan “Lisenziyalash, ruxsat berish va xabardor etish tartib-taomillari to‘g‘risida”gi Qonun loyihasi joylashtirilgan.

Mazkur hujjatning asosiy maqsadi - faoliyatning ayrim turlarini litsenziyalash, tadbirkorlik faoliyati sohasidagi ruxsat berish va xabardor etish bilan bog‘liq munosabatlarni tartibga solish hisoblanadi.

Ushbu Qonunning amal qilishi quyidagi faoliyat turlariga nisbatan tatbiq etilmaydi:

• intellektual mulk obektlaridan foydalanishda, shuningdek kompleks tadbirkorlik litsenziyasi shartnomasi (franshizing to‘g‘risidagi shartnoma) bo‘yicha yuzaga keladigan munosabatlarga;
• tadbirkorlik sub'yektlarini, bitimlarni, huquqlarni va mol-mulkni davlat ro‘yxatidan o‘tkazish hamda hisobga qo‘yish;
• akkreditatsiya qilish, sertifikatlashtirish, standartlashtirish, metrologiya va texnik jihatdan tartibga solish;
• davlat ekologik ekspertizasi;
• davlat sirlari muomalasi.

Qonun loyihasi ruxsat berish tartibotlarining quyidagi jihatlarini tartibga solishga yo‘naltirilgan qoidalarni o‘z ichiga olgan:

• litsenziyalash, ruxsat berish va xabardor etish tartib-taomillarining asosiy prinsiplari;
• litsenziyalashni, ruxsat berish yoki xabardor etish tartib-taomillarini joriy etishning asosliligi va samaradorligi;
• Vazirlar Mahkamasining litsenziyalash va ruxsat berish tartib-taomillariga doir vakolatlari;
• litsenziyalarning va ruxsat etish xususiyatiga ega hujjatlarni berish;
• yagona onlayn elektron portal;
• litsenziyalash;
• ruxsat berish tartib-taomillari;
• litsenziyalash va tadbirkorlik faoliyati sohasidagi ruxsat berish tartib-taomillari to‘g‘risidagi umumiy qoidalar;
• xabardor etish tartibi.

Shuningdek, Qonun loyihasi quyidagilarni o‘z ichiga olgan:

• amalga oshirilishi uchun litsenziya talab qilinadigan faoliyat turlarining ro‘yxati;
• ruxsat berish tartib-taomillarining turlarining ro‘yxati;
• vakolatli organlarni xabardor qilish tartibida amalga oshiriladigan faoliyat turlari ro‘yxati.

Loyiha o‘zgartirilishi, unga qo‘shimchalar kiritilishi yoki rad etilishi mumkin.