Лицензиялаш, рухсат бериш ва хабардор этиш тартиби битта қонунда бўлади

Қонун ҳужжатлари таъсирини баҳолаш тизими порталида Адлия вазирлиги томонидан тайёрланган “Лицензиялаш, рухсат бериш ва хабардор этиш тартиб-таомиллари тўғрисида”ги Қонун лойиҳаси жойлаштирилган.

Мазкур ҳужжатнинг асосий мақсади - фаолиятнинг айрим турларини лицензиялаш, тадбиркорлик фаолияти соҳасидаги рухсат бериш ва хабардор этиш билан боғлиқ муносабатларни тартибга солиш ҳисобланади.

Ушбу Қонуннинг амал қилиши қуйидаги фаолият турларига нисбатан татбиқ этилмайди:

интеллектуал мулк объектларидан фойдаланишда, шунингдек комплекс тадбиркорлик лицензияси шартномаси (франшизинг тўғрисидаги шартнома) бўйича юзага келадиган муносабатларга;
тадбиркорлик субъектларини, битимларни, ҳуқуқларни ва мол-мулкни давлат рўйхатидан ўтказиш ҳамда ҳисобга қўйиш;
аккредитация қилиш, сертификатлаштириш, стандартлаштириш, метрология ва техник жиҳатдан тартибга солиш;
давлат экологик экспертизаси;
давлат сирлари муомаласи.

Қонун лойиҳаси рухсат бериш тартиботларининг қуйидаги жиҳатларини тартибга солишга йўналтирилган қоидаларни ўз ичига олган:

лицензиялаш, рухсат бериш ва хабардор этиш тартиб-таомилларининг асосий принциплари;
лицензиялашни, рухсат бериш ёки хабардор этиш тартиб-таомилларини жорий этишнинг асослилиги ва самарадорлиги;
Вазирлар Маҳкамасининг лицензиялаш ва рухсат бериш тартиб-таомилларига доир ваколатлари;
лицензияларнинг ва рухсат этиш хусусиятига эга ҳужжатларни бериш;
ягона онлайн электрон портал;
лицензиялаш;
рухсат бериш тартиб-таомиллари;
лицензиялаш ва тадбиркорлик фаолияти соҳасидаги рухсат бериш тартиб-таомиллари тўғрисидаги умумий қоидалар;
хабардор этиш тартиби.

Шунингдек, Қонун лойиҳаси қуйидагиларни ўз ичига олган:

амалга оширилиши учун лицензия талаб қилинадиган фаолият турларининг рўйхати;
рухсат бериш тартиб-таомилларининг турларининг рўйхати;
ваколатли органларни хабардор қилиш тартибида амалга ошириладиган фаолият турлари рўйхати.

Лойиҳа ўзгартирилиши, унга қўшимчалар киритилиши ёки рад этилиши мумкин.