Davlat bayrog‘ini namoyish etishda yagona talablar joriy etiladi

Qonun loyihasiga ko‘ra, O‘zbekiston davlat bayrog‘i mamlakat suvereniteti va davlat ramzi sifatida barcha joylarda belgilangan yagona qoidalar asosida namoyish etilishi lozim. Xususan, bayroqni dastasiz vertikal holatda joylashtirish tartibi aniq belgilab beriladi.

Loyihada davlat bayrog‘ining sxematik va rangli tasviri hamda uni dastasiz vertikal holatda namoyish qilish tasviri alohida tasdiqlanishi nazarda tutilgan.

Shuningdek, mahalliy davlat hokimiyati organlari majlislar zallarida, diplomatik vakolatxonalarda va xizmat xonalarida bayroqni joylashtirish qoidalari aniqlashtirilmoqda. Bayroq ishtirokchilarga to‘siqsiz ko‘rinadigan markaziy o‘rinda turishi, matosi yerga tegmasligi shartligi belgilanadi. Bir nechta bayroq namoyish etilganda esa davlat bayrog‘i ustuvor ravishda markaziy yoki o‘ng tomonda joylashtirilishi ko‘zda tutilgan.

Ommaviy tadbirlarda bayroqni joylashtirish va olib yurish tartibi ham belgilanmoqda. Xususan, saf tortish tartibida o‘tadigan tadbirlarda davlat bayrog‘i safning old qismida joylashtiriladi va uni boshqa bayroqlardan keyin olib yurish taqiqlanadi.

Qonun loyihasiga muvofiq, bayroqni devor yoki boshqa konstruksiyaga vertikal holatda namoyish etganda yangi oy va yulduzlar qismi yuqori o‘ng burchakda joylashishi, bayroq matosi yerga tegmasligi lozim. Bayroqni teskari yoki estetik ko‘rinishini buzuvchi holatda namoyish qilish, ustiga buyum qo‘yish yoki hurmatsiz munosabat bildirish taqiqlanadi.

Shu bilan birga, davlat va jamiyat taraqqiyotiga munosib hissa qo‘shgan shaxslar, harbiy xizmatchilar va huquqni muhofaza qiluvchi organlar xodimlari xizmat burchini bajarish chog‘ida halok bo‘lgan hollarda davlat bayrog‘ini tobut ustiga yopish tartibi ham aniq belgilab qo‘yilmoqda.

Qonun loyihasi davlat ramzlaridan foydalanishda huquqiy barqarorlikni ta’minlash, milliy birlikni mustahkamlash va davlat ramzlariga hurmatni yanada oshirishga xizmat qilishi ta’kidlanmoqda.