«Barsa»da mag‘lubiyat, van Persining o‘g‘lidan shedevr gollar

Angliya: «Aston Villa» «Arsenal»ga raqobatchi emas

«Vulverhempton» – «Nyukasl Yunayted» 0:0
«Vulverhempton»: Joze Sa, S. Bueno, Kreychi, Moskera, Andre, Gomes (Arias, 71), Mane, U. Bueno, Chachua, Hvang Hi Chhang (Gomesh, 86), Arokodare (Larsen, 65)
«Nyukasl Yunayted»: Poup, Botman, Tshau, Holl, Trippiyer, Tonali (Mayli, 67), Joelinton, Gimarayns, Gordon (Vissa, 67), Barns, Voltemade (Elanga, 67)
Ogohlantirishlar: Moskera, 78. Andre, 90 – Tonali, 58. Botman, 89

Turnir jadvalining birinchi yarmiga qaytib olgan «Nyukasl» yevrokuboklar uchun kurashni davom ettirmoqda. Ammo bu safargi raqib inqirozdan chiqib olgan va qatorasiga to‘rt o‘yinni yutqazmagan «Vulverhempton» bo‘ldi.

Mehmonlar birinchi bo‘limda to‘pga egalik qilgan bo‘lsa-da, deyarli golli vaziyatlarga ega bo‘lmadi: uzatmalar aniqligi 94 foiz bo‘lgani holda birorta zarba raqib darvozasi tomon to‘g‘ri bormadi.

Eddi Hau ikkinchi bo‘limda birdaniga uchtalik almashtirish qildi: 20 dekabrdan buyon gol ura olmayotgan Voltemade, shuningdek, hujumdagi ikki muhim ijrochi – Gordon va Tonali maydondan olindi. «Nyukasl» o‘yin oxirida jokerlar hisobiga bosimni kuchaytirishdi, bir necha vaziyatda «bo‘rilar» darvozaboni Saga ham ish topildi, ammo hisob ochilmay qoldi. «Nyukasl» g‘alaba qozonib, «Chelsi»ni quvib o‘tishi va ochkolar soni bo‘yicha «MYu» bilan tenglashib olishi mumkin edi, ammo bu imkoniyatdan foydalana olmadi va sakkizinchi o‘rinda qoldi. Shu bilan birga, to‘rtinchi o‘rin bilan farq atigi uch ochkoni tashkil etmoqda.

«Aston Villa» – «Everton» 0:1
Gol: Barri, 59 (0:1)
«Aston Villa»: Martines, Konsa, Pau Torres, Matsen (Din, 73), Kesh, Tilemans, Bogard (Hemmings, 73), Rodjyers, Buendiya, Makginn (Gessan, 18), Uotkins
«Everton»: Pikford, Tarkovski, O`Brayyen, Mikolenko, Patterson, Rel, Garner, Armstrong, Grilish, Makneyl, Barri (Betu, 84)
Ogohlantirishlar: Bogard, 56 – Makneyl, 23. Garner, 47

Unai Emeri Makginn jarohat olishi tufayli o‘yinning dastlabki qismidayoq o‘zgarish qilishga majbur bo‘ldi. Oqsoqlangancha maydonni tark etgan sardor o‘rnini shu kunlarda Afrika kubogidan qaytib kelgan forvard Gessan egalladi.

Mezbonlarda o‘yinni qaytadan qurish juda og‘ir kechdi va «Aston Villa» mehmonlarning goli bekor qilinganidan keyingina tashabbusni o‘z qo‘liga ola boshladi. Bir necha daqiqa ichida Pikford va unga yordamga kelgan himoyachi Rodjyers navbatdagi golini urishiga to‘sqinlik qilishdi, Gessanning boshda yo‘llagan zarbasi esa darvoza to‘siniga bordi.

Ikkinchi bo‘limda esa birminghemliklar himoyasi pand berdi: Pikfordning uzun uzatmasidan keyin Pau Torres to‘pni qaytarishda xatoga yo‘l qo‘ydi va Maknil aylanma zarba yo‘lladi. Emiliano Martines uning zarbasini to‘sdi, ammo qaytgan to‘pga birinchi bo‘lib yetib kelgan Barri hisobni ochdi.

Bungacha «Villa Park»da qatorasiga to‘rt o‘yinda yutqazgan «Everton» g‘alabali hisobni ushlab qoldi. Buning uchun Pikford Rodjyersning zarbasidan keyin darvoza to‘sini ostidan kirayotgan to‘pni qaytarishiga to‘g‘ri keldi. Bu orqali u amalda «Villa»ni chempionlik poygasida qolishdan mahrum etdi. «Arsenal» bilan oradagi farq yetti ochkoga yetdi va Unai Emeri endi kuchli to‘rtlikda qolish haqida qayg‘urishi kerak bo‘ladi.

Ispaniya: Syorlot va Gedeshning kuni

«Atletiko» – «Alaves» 1:0
Gol: Syorlot, 48 (1:0)
«Atletiko»: Oblak, Gansko, Pubil, Rudjyeri, Liorente, Kardozo (Le Norman, 78), Barrios, Almada (Koke, 62), Simeone (Baena, 62), Syorlot (Molina, 86), Alvares (Grizmann, 62)
«Alaves»: Sivera, Pacheko, Tenalya, Parada, Otto, Blanko (Manyas, 81), Guridi (Suares, 54), Ibanes (Gevara, 55), Alenya (Rebbach, 69), Visente, Martines (Boyye, 55)
Ogohlantirishlar: Kardozo, 27 – Ibanes, 6

Birinchi bo‘limda «Atletiko» «Alaves» mudofaasini yorib o‘tishga behuda urindi, ammo tanaffusdan keyinoq kerakli retsept topildi. Juliano Simeone barcha qanotdan uzatma berishini kutib turganida yerlatib bergan pasi bilan Barriosni oldinga boshladi, uning uzatmasini esa Syorlot bosh bilan golga aylantirdi.

Norvegiyalik hujumchi bu mavsumdagi gollarining barchasini startda tushgan o‘yinlarida urmoqda. Holbuki u o‘tgan mavsumda zaxiradan tushib urgan gollari soni bo‘yicha (12) La Liga rekordini o‘rnatgandi.

Lekin eng muhimi – jamoa g‘alabasi. «Atletiko»ning yakshanba kungi muvaffaqiyati yanada ishonchli ko‘rinishda bo‘lishi mumkin edi, ammo Aleksa Baenaning zarbasini darvoza ustuni to‘sib qoldi. O‘yin oxirida esa madridliklarning omadi kelib, darvoza daxlsizligi saqlanib qoldi.

«Matraschilar» Chempionlar ligasiga yo‘llanma beruvchi kuchli to‘rtlikdagi o‘rnini mustahkamladi. Beshinchi o‘rindagi «Espanyol» bilan oradagi farq yetti ochkoga yetdi, bitta zaxira o‘yini bor bo‘lgan «Vilyarreal» esa faqat qo‘shimcha ko‘rsatkichlar hisobiga Simeone jamoasinidan oldinda joylashgan.

«Real Sosiyedad» – «Barselona» 2:1
Gollar: Oyyarsabal, 32 (1:0). Reshford, 70 (1:1). Gonsalu Gedesh, 71 (2:1)
«Real Sosiyedad»: Remiro, Subeldiya, Xon Martin, Gomes (Ayyen Munos, 69), Aramburu (Chaleta-Tsar, 82), Turrentes (Odriosola, 58), Soler, Gonsalu Gedesh, Kubo (Barrenechea, 69), Oyyarsabal, Mendes (Gorrotchategi, 58)
«Barselona»: X. Garsiya, Kubarsi (Martin, 86), E. Garsiya, Balde (Joau Kanselu, 62), Kunde (Bardji, 85), de Yong, Olmo (Reshford, 63), Pedri, Fermin Lopes, Yamal, Torres (Levandovski, 62)
Ogohlantirishlar: Turrentes, 37. Aramburu, 51. Subeldiya, 78 – E. Garsiya, 76. Levandovski, 84. Fermin Lopes, 85
Chetlatish: Soler, 88

«Real Sosiyedad» bosh murabbiy almashganidan keyin har qanday jamoa uchun kuchli raqibga aylandi. Basklar yakkakurashlarda keskin, tajovuzkor harakat qilmoqda va o‘yin oxirigacha kurashmoqda. Jamoa Pellegrino Mataratsso boshqaruvga kelganidan keyin «Atletiko»dan ochko tortib oldi (1:1), «Xetafe» bilan o‘yinga qo‘shib berilgan oltinchi daqiqada g‘alaba golini urib ketdi, keyin esa kubok doirasida «Osasuna»ga qarshi o‘yinning qo‘shimcha daqiqalarida hisobni tenglashtirib, penaltilar seriyasida g‘olib chiqdi. Umuman olganda, ushbu jamoa «Barselona»ga qarshi o‘yinga yaxshi kayfiyatda yetib kelgandi.

Kataloniyaliklar esa bu o‘yinda asosiy yetakchisi Rafinyaning xizmatlaridan foydalana olishmasdi: braziliyalik futbolchida jarohat yo‘q, ammo Hansi Flik uni asrashga qaror qildi. Bosh murabbiy yozda «PSJ»ga o‘tishi aniq bo‘lgan Dro Fernandesni ham qaydnomadan tashqarida qoldirdi. U bu orqali La Masiya tarbiyalanuvchilariga jiddiy signal yubordi: «Ular bor e’tiborini jamoaga qaratishi kerak. Men futbolchilarda bu klub ranglarini himoya qilish istagini ko‘rishni istayman. Ikkilanadiganlar bizga kerak emas».

Mezbonlar Ispaniya Superkubogi g‘olibligi sharafiga «Barselona» uchun chempionlik yo‘lagi tashkil etishdi. Ammo o‘yin boshlanganidan keyin mehmonnavozlik unutildi va 25-soniyadayoq Garsiya qo‘riqlayotgan darvozani ishg‘ol etishdi. Gol yaqqol «o‘yindan tashqari» holat tufayli bekor qilindi. Keyin esa «Barselona» hisobni ochishiga ofsayd holati xalaqit qildi. Avvaliga 7-daqiqada Fermin Lopesning goli Dani Olmoning Kuboga foli tufayli inobatga olinmadi, keyin Yamalning goli bekor qilindi (VAR vaziyatni ikki daqiqadan ortiq vaqt davomida tekshirdi, chunki to‘p Laminga kimdan kelganini aniqlash oson emasdi), keyin esa ofsayd holati tufayli «Barsa» foydasiga penalti berilmay qoldi.

«Real Sosiyedad»ning birinchi bo‘limda urgan goli esa hisobga olindi. Oyarsabal Gonsalu Gedeshning uzatmasidan keyin to‘pni to‘xtatmasdan darvoza to‘riga joyladi. Bu vaziyatda uning boshqa jamoadoshi ofsaydda edi va Kundeni chalg‘itgandi. Ammo arbitrlar buni passiv ofsayd holati deb topishdi.

Ikkinchi bo‘limda esa «Sosiyedad» darvozaboni Remiro o‘zining eng yaxshi o‘yinlaridan birini o‘tkazdi va bir necha bor qutqardi. 70-daqiqada Reshford baribir hisobni tenglashtirdi, ammo mezbonlar darhol ikkinchi gol bilan javob berishdi. Bu vaziyatda Joan Garsiya u qadar xavfli bo‘lmagan zarbani qaytarishda ishonchsiz harakat qildi va raqib hujumi davom etdi, bu hujumni Gedesh qaytarib bo‘lmas zarba bilan yakunladi.

O‘yin oxirida ikki jamoada ham gol urish uchun imkoniyatlar bo‘ldi, avvaliga Kubarsi to‘pni chiziq ustida qaytarib qoldi, keyin Kundening zarbasi to‘singa tegdi. So‘nggi daqiqalarda Soler qizil kartochka olib jamoasini qiyin ahvolga tushirib qo‘ydi, ammo basklar oxirigacha kurashib, g‘alabani va chempionatdagi intrigani saqlab qolishdi. Endi «Barselona» va «Real» o‘rtasidagi farq atigi bir ochkoni tashkil etmoqda.

Italiya: Dibalaning yubileyi

«Torino» – «Roma» 0:2
Gollar: Malen, 26 (0:1). Dibala, 72 (0:2)
«Torino»: Paleari, Ismayli, Koko, Tamez, Amirxon Ilhan (Andjorin, 77), Vlashich, Gineytis (Kazadei, 46), Abuhilol (Pedersen, 31), Lazaro, Adams, Ngonge (Njiye, 78)
«Roma»: Svilar, N`Dika, Ermoso (Gilardi, 22), Manchini, Kristante, Kone, Uesli Vinisius, Rench (Tsimikas, 77), Pellegrini (Soule, 52), Dibala (Pizilli, 77), Malen (Vaz, 76)
Ogohlantirishlar: Ismayli, 9. Vlashich, 90 – Manchini, 55

«Roma» bir kun oldin «Kalyari»ga sensatsion ravishda yutqazgan «Yuventus»dan sovg‘a olgandi. Shu kunlarda «Aston Villa»dan transfer qilingan Donni Malen esa bu imkoniyatdan foydalanish va turinliklardan uch ochkoga o‘zib ketishda yordam berdi.

Niderlandiyalik hujumchi rimliklar safidagi ilk o‘yinini yaqin burchakka xavfli zarba yo‘llash bilan boshladi. Keyin esa uning goli  mikroskopik ofsayd holati tufayli bekor qilindi. Ammo u faol harakatdan to‘xtamadi va bo‘lim o‘rtalaridan o‘tganida Dibalaning uzatmasini golga aylantirdi.

Jan Piyero Gasperini shogirdlarini o‘tgan haftada Italiya kubogidagi mag‘lubiyat uchun o‘ch olishga ruhlantirgani ko‘rinib turdi. «Torino» o‘shanda Rim jamoasini uchta gol bilan karaxt holatiga tushirgan, bu gollardan uchinchisi arbitr tomonidan qo‘shib berilgan daqiqalarda urilgandi (2:3).

Aftidan, anorranglilar o‘shanda omad limitini tugatib bo‘lgandi va ikkinchi bo‘limda Dibalaning golidan keyin bu o‘yinni qutqarishning imkoni qolmadi. Endi ushbu argentinalik hujumchi A Seriyada so‘nggi yigirma yil ichida gol+pas bo‘yicha 200 (131+69) dovonni zabt etgan ilk legionerga aylandi.

«Milan» – «Lechche» 1:0
Gol: Fyullkrug, 76 (1:0)
«Milan»: Menyan, Gabbia, de Vinter, Tomori, Richchi (Loftus-Chik, 73), Rabio, Yashari (Modrich, 87), Estupinyan, Salemakers (Atekame, 80), Leau (Nkunku, 87), Pulishich (Fyullkrug, 72)
«Lechche»: Falkone, Zibert, Tiagu Gabriel, Gallo (N`Dri, 84), Ndaba, Ramazoniy (Male, 85), Kulibali, Gandelman, Perotti, Sottil (Banda, 54), Shtulich (Tete Morente, 68)
Ogohlantirishlar: de Vinter, 21 – Ramazoniy, 84

«Milan» – A Seriyada intriga saqlanib qolishini ta’minlamoqda. «Inter»ni ta’qib etayotgan rossonerilar hafta ichida ikkinchi bor o‘z o‘yinini hamshaharlaridan keyin o‘tkazdi va jamoaning xato qilishga huquqi yo‘q edi. Bu bir tomondan ruhiy bosim. Boshqa tomondan esa maksimal ishtiyoq va e’tiborni jamlagan holda o‘ynashga imkon beradi. Bu payshanba oqshomida mavsum kashfiyoti «Komo» ustidan ishonchli g‘alabaga (3:1) erishishda yordam bergandi.

Qatorasiga ikki durangdan keyin Massimiliano Allegrida skudetto uchun kurashda qolishning boshqa varianti ham qolmagandi. Ammo turnir jadvalining quyi qismida kelayotgan «Lechche»ga qarshi o‘yin o‘ta og‘ir kechdi. Barchasini zaxira imkoniyatlari hal qildi: Salemakersning uzatmasidan keyin jamoaga qishki transferlar doirasida «Vest Hem»dan kelib qo‘shilgan Fyullkrug g‘alaba golini urdi.

Endi «Inter» bilan oradagi farq uch ochkogacha qisqardi. Keyingi turda «Milan» «Roma» maydoniga safar qiladi.

Niderlandiya: o‘g‘il otasi uchun

«Feyyenoord» – «Sparta» 3:4
Gollar: Hvang In Bom 64, Shakil van Persi 87,88 – Kitolano 40, 90+3, Mitchell 55, Mito 71

Rotterdam derbisi muxlislar uchun ajoyib syujyet taqdim etdi. Hisob 0:2 ko‘rinishiga kelgach, «Feyyenoord» bosh murabbiyi Robin van Persi maydonga o‘zining 19 yoshli o‘g‘li Shakilni tushirdi. Yosh forvard bungacha asosiy jamoada Eredivizya, Yevropa Ligasi va Niderlandiya kubogida jami uchta o‘yinda zaxiradan tushirilib, 21 daqiqa o‘ynagandi. Bu safar ancha ko‘proq vaqtga ega bo‘lgan hujumchi bu imkoniyatdan foydalandi va barchaning e’tiborini o‘ziga qaratdi. Kichik van Persi ikki daqiqa ichida avvaliga tovonida yo‘llagan zarbasi bilan hisobni qisqartirdi, keyin esa qaychi uslubidagi zarba bilan muvozanatni tikladi.

Bu gollardan keyin «De Kayp» stadionida yig‘ilgan muxlislar aqldan ozay dedi, ammo baribir o‘yin bayramga aylanmadi. Qo‘shimcha daqiqalarda «Sparta» to‘rtinchi golni urib, g‘alabani ilib ketdi, «Feyyenoord» esa turnir jadvalida ikkinchi o‘rinda qoldi.