Shavkat Mirziyoyev Butunjahon urbanizatsiya forumi ochilishida ishtirok etdi

Shavkat Mirziyoyev Butunjahon urbanizatsiya forumining 13-sessiyasi ochilish marosimida ishtirok etdi. Boku shahrida o‘tayotgan anjumanda davlat va hukumat rahbarlari, xalqaro tashkilotlar hamda rivojlanish institutlari vakillari jam bo‘ldi.

Foto: Prezident matbuot xizmati

Forum BMTning Aholi punktlari bo‘yicha dasturi shafeligida tashkil etilgan bo‘lib, bu yilgi yig‘in “Barcha uchun uy-joy: xavfsiz va barqaror shaharlar hamda hamjamiyatlar” mavzusiga bag‘ishlandi.

Boku shahri Kongress-markazida O‘zbekiston rahbarini Ilhom Aliyev hamda BMTning Aholi punktlari bo‘yicha dasturi ijrochi direktori Anaklaudiya Rossbax kutib oldi. Marosim doirasida ishtirokchilarning birgalikda suratga tushish tadbiri ham bo‘lib o‘tdi.

Forum kun tartibidan shaharlarni barqaror rivojlantirish, aholini zamonaviy va hamyonbop uy-joy bilan ta’minlash, shahar muhiti sifatini oshirish, iqlim barqarorligini mustahkamlash, transport va ijtimoiy infratuzilmani rivojlantirish kabi masalalar o‘rin olgan.