Janubiy Koreya va Shimoliy Koreya bir-birini ogohlantirish maqsadida o‘q uzdi

Janubiy va Shimoliy Koreya Koreya yarimoroli qirg‘oqlaridagi bahsli chegara hududida ogohlantiruvchi o‘q uzdi. Seuldagi Mudofaa vazirligi ma’lumotlariga ko‘ra, Janubiy Koreya qo‘shinlari 24 oktyabr, dushanba kuni tong otguncha Shimoliy Koreya savdo kemasini demarkatsiya chizig‘idan janubdagi hududdan ogohlantiruvchi o‘qlardan foydalangan holda chiqarib yubordi. Bunga javoban KXDR Sariq dengizdagi bufer zonani artilleriyadan o‘qqa tutdi. Shu tariqa, KXDR 2018 yildagi vaziyatni yumshatish bo‘yicha kelishuvni buzdi, deya ta’kidladi Seul. 

O‘z navbatida, KXDR harbiy rahbariyati Janubiy Koreyani Shimoliy Koreya chegarasini buzganlikda aybladi. Pxenyandagi Bosh shtab ma’lumotlariga ko‘ra, Janubiy Koreya harbiy kateri noma’lum kemaga qarshi operatsiya bahonasida KXDR nazoratidagi hududga bostirib kirgan, biroq Shimoliy Koreya bunga javoban o‘nta snaryad otgan va «bu dushmanga jiddiy ogohlantirish bo‘lgan».

Shimoliy Koreya Koreya yarimoroli qirg‘oqlaridagi Shimoliy chegara chizig‘ini (NLL) tan olmaydi. Bu chiziq BMT kuchlari tomonidan 1950-53 yillardagi Koreya urushidan keyin ikki Koreya davlati o‘rtasidagi to‘qnashuvlarning oldini olish maqsadida bir tomonlama o‘rnatilgan.

Hozirgi chegaradagi hodisa mintaqadagi keskinlikning keskin kuchayishi fonida yuz berdi. KXDR so‘nggi paytlarda noodatiy tarzda ballistik raketalarni sinovdan o‘tkazmoqda hamda yaqinda Koreya yarimorolining sharqiy va g‘arbiy sohillari chegaralari bo‘ylab artilleriyadan o‘qqa tutdi. Shu bilan birga, Janubiy Koreya Shimoliy Koreyadan kelayotgan tahdidni bartaraf etish uchun o‘tgan haftada yillik harbiy mashg‘ulotlarini boshladi.