O‘zbekiston | 11:02 / 22.04.2021

8 daqiqa o‘qiladi

Ispaniyada joylashgan Karles Rahola nomidagi jamoat kutubxonasiga sayohat (foto)

Yevropa davlatlaridagi ko‘plab kutubxonalarda sharoit juda qulay, kirish va foydalanish esa oson bo‘ladi. Xususan, Daniya, Germaniya, Sloveniya va Ispaniyadagi jamoat kutubxonalariga qilgan tashriflarim menda shunday taassurot qoldirgan.

Bugun siz bilan hozirda o‘zim yashab turgan shahar – Jironada (Ispaniya) joylashgan Karles Rahola nomidagi jamoat kutubxonasiga sayr qilamiz.

*Jirona shahar jamoat kutubxonasi binosining tashqi ko‘rinishi*

Kirish

Hozirda kutubxonaga kirish uchun qabulxonada kutubxona kartasi yoki shaxsingizni tasdiqlovchi biror hujjatni ko‘rsatishingiz kerak. Aslida kutubxonaga hech qanday hujjatni ko‘rsatmasdan kirish mumkin, biroq pandemiya sababli kirishda yuqorida tilga olingan hujjatlardan birini taqdim qilish so‘raladi.

Eshikdan kirishingiz bilan qo‘lni dezinfeksiya qilish vositasini uchratasiz – kirishda qo‘lni dezinfeksiya qilish shart.

*Kutubxonaga kirganda eshik yonidagi qo‘lni dezinfeksiya qilish vositasi*

Bahor faslida tez-tez yomg‘ir yog‘ib turishini hisobga olib, kirish eshigi ichkarisida soyabonga kleyonka kiydiruvchi moslama ham o‘rnatilgan. Bu yomg‘irdan ho‘l bo‘lgan soyabonning suvi kutubxona binosi ichiga oqishining oldini oladi.

*Soyabonga kleyonka kiygizish moslamasi*

Kutubxona binosi 3 qavatdan iborat. 1-qavatda qabulxona, kafe, jamoaviy ishlash uchun xonalar, bolalarga mo‘ljallangan xonalar va o‘qish xonalari mavjud. Lekin koronavirus sababli 1-qavatdagi ko‘pgina xonalar va kafe hozirda yopib qo‘yilgan. 2- va 3-qavatdagi xonalarning aksariyati esa ochiq.

*1-qavat, kiraverishdagi dekoratsiyalardan biri*

*1-qavatdagi kafe, pandemiya sababli yopiq*

*Yuqori qavatlarga ko‘tarilish uchun zina (lift orqali ko‘tarilsa ham bo‘ladi)*

Koronavirus bilan bog‘liq cheklovlar va o‘zgarishlar

Pandemiya sababli kutubxonadan foydalanishda bir qancha cheklovlar o‘rnatilgan. Jumladan, yuqorida aytilganidek, kafe va ayrim xonalar yopilgan. Shuningdek, ochiq xonalarning ham aksariyatidan kursilar olib chiqib ketilgan; bunday xonalarga kirib, u yerdagi kitoblarni foydalanish uchun olish mumkin bo‘lsa-da, xonaning o‘zida o‘tirib o‘qish mumkin emas.

*2-qavatdagi xonalardan biri: xonadagi kursilar va o‘tishga mo‘ljallangan jihozlar olib chiqib ketilgan, lekin xonaga kirib, kitoblarni olib foydalanish mumkin*

Hozirda kompyuterlardan foydalanish ham cheklangan. Aksariyat kompyuterlar o‘chirib qo‘yilgan, foydalanish uchun faqat 10 ta kompyuter qoldirilgan.

*2-qavatdagi xonalardan biri: xonadagi kursilar va kompyuterlarning aksariyati chiqarib tashlangan, qoldirilgan bir nechta kompyuter ham o‘chirib qo‘yilgan*

O‘tirib o‘qiladigan yoki dars qilinadigan stol va kursilar esa katta zallarga bir-biridan uzoq qilib joylashtirilgan. Hozirda kutubxonada o‘tirib o‘qish/dars qilish uchun faqat 68 ta o‘rin mavjud – bir vaqtning o‘zida faqat 68 kishi kutubxonada o‘tirib o‘qishi mumkin.

*2-qavatdagi zalga o‘tirib dars qilish uchun joylashtirilgan stol va kursilar*

*2-qavatdagi kichik ma'ruzalar zali: kursilari bir-biridan uzoq qilib joylashtirilgan, kursilarning aksariyati yig‘ib olinib, xona chekkalariga terib qo‘yilgan*

Bundan tashqari, zallar, xonalar va boshqa joylardagi alohida dizaynga ega yumshoq mebellar ham yig‘ib olingan.

*1-qavatdagi bolalar uchun mo‘ljallangan xona: yumshoq mebellar va kursilar chiqarib tashlangan*

*Zallar va boshqa xonalardan yig‘ib olingan yumshoq mebellar, kursilar va boshqa jihozlar joylangan xona*

Shuningdek, o‘tirib dars qilish uchun tashkillashtirilgan 68 ta stolning har birida maxsus belgili varaqa mavjud. Uning bir tarafida yashil rangli «Foydalanish mumkin. Ketishda varaqani teskariga o‘giring» degan yozuv, ikkinchi tarafida qizil rangli «Foydalanishga yaroqsiz. Tozalanishi kerak» degan yozuv bor.

Kitobxon kutubxonada o‘tirib dars qilmoqchi bo‘lsa, varaqaning yashil tarafi tepaga qarab turgan stol va uning yonidagi kursidan foydalanishi kerak. Foydalanib bo‘lib, chiqib ketayotganda varaqaning qizil tarafini o‘girib ketadi va tozalovchi xodimlar stol va stulni, agar stolda kompyuter bo‘lsa, uni ham artib, dezinfeksiya qiladi va varaqani yana yashil tarafga burib qo‘yadi. Unga qadar bunday stol, kursi va kompyuterdan foydalanish mumkin emas.

*Maxsus varaqa: kompyuterdan foydalanish mumkinligini ko‘rsatmoqda*

*Maxsus varaqa: Kompyuter va stol tozalanishi kerakligi, ungacha foydalanish mumkin emasligini ko‘rsatmoqda*

Bundan tashqari, yuz niqobisiz kutubxonaga kirish yoki kutubxonada o‘tirish mumkin emas.

Kutubxonadagi resurslardan foydalanish

Kutubxona binosi, undagi Wi-Fi tarmog‘i, kitoblar va qog‘oz shaklidagi boshqa manbalardan foydalanish uchun kutubxonaga a'zo bo‘lishingiz shart emas. Shunchaki, kutubxonaga kirib, kerakli kitob yoki materialni olib foydalanaverasiz.

Biroq kutubxonadagi kompyuterlardan foydalanish, kitoblarni ma'lum muddatga o‘zingiz bilan olib ketish uchun kutubxonaga a'zo bo‘lib, kutubxona kartasini ochishingiz kerak.

Kutubxonaga a'zo bo‘lish va karta ochtirish bepul. Agar kartani yo‘qotib qo‘ysangiz, qayta karta qilishda ma'lum summa undiriladi.

Ko‘pgina talabalar odatda o‘zining noutbukini olib kelib, kutubxonada o‘tirib dars qiladi. Kutubxonaning Wi-Fi tarmog‘i va uning paroli har bir stol ustida alohida qog‘ozda yozib qo‘yilgan.

*Foydalanuvchi stoli ustidagi kutubxonaning Wi-Fi tarmog‘i nomi va paroli (hamda boshqa ayrim ma'lumotlar) yozilgan qog‘oz*

Kutubxonaning har-har yerida chiqindi qutilari ham mavjud. Odatda qog‘oz, plastik va ulardan boshqa turdagi chiqindilar uchun alohida qutilar qo‘yilgan bo‘ladi.

*2-qavatda zinaning yonidagi chiqindi qutilari*

Har bir qavatda mazkur qavatning xaritasi joylashtirilgan bo‘lib, ulardan ko‘zi ojizlar ham foydalana olishi uchun xarita ma'lumotlari Brayl yozuvida ham yozilgan.

*2-qavatdagi qavat xaritasi; xarita ostida ma'lumotlar Brayl yozuvida yozilgan*

Kutubxonada foydalanish uchun hojatxonalar ham bor. Ularning eshigiga ham Brayl yozuvida yozilganini ko‘rish mumkin.

*2-qavatdagi hojatxonalar; eshikdagi surat ostida Brayl yozuvida «Hojatxona» deb yozilgan*

Tabiiy dekoratsiyalar

Ispaniyada binolarning ichidan alohida shishali xona qilib, u yerda daraxt, gul va boshqa manzarali o‘simliklar ekish orqali tabiiy dekoratsiya qilish ancha ommalashgan. Bunday dekoratsiyalarni Jirona kutubxonasida ham ko‘rish mumkin. Bunday dekoratsiya qarshisida o‘tirib dars qilsangiz, o‘zingizni tabiat qo‘ynida o‘tirgandek his qilasiz.

*Kutubxonadagi tabiiy dekoratsiyalardan biri, 2-qavat*

*Kutubxonadagi tabiiy dekoratsiyalardan biri; 2-qavatdagi o‘qish xonasidan ko‘rinishi*

Ta'kidlash joizki, kutubxonadagi maxsus dizaynga ega yumshoq mebellar, ko‘pgina stol va kursilari, dekoratsiyalar va boshqalarning pandemiya sababli yig‘ib olinishi kutubxona dizaynini sodda qilib qo‘ygan. Kutubxonaning pandemiyadan oldingi ichki dizayni anchagina jozibador ko‘rinishga ega bo‘lgan. Kutubxonaning pandemiyadan oldingi ichki dizayni bilan quyidagi havola orqali virtual tarzda tanishishingiz mumkin.

P.S. Hozirda kutubxona dushanba-payshanba kunlari 10:00 dan 20:00 gacha, juma kuni 10:00 dan 15:00 gacha ishlamoqda. Shanba va yakshanba kunlari ishlamaydi.

Maqsud Salomov,
Uzbek.Life uchun Ispaniyadan maxsus

#kutubxona #Ispaniya