Shveytsariyada radar tezlikni oshirgan o‘rdakni suratga oldi

Shveytsariyaning Kenits komunnasida yo‘l kamerasi tezlikni oshirgan o‘rdakni suratga oldi. Bu mazkur hududdagi birinchi holat emas, deb xabar beradi Berner Zeitung.

Qayd etilishicha, «qoidabuzar» o‘rdak surati mahalliy hukumat tomonidan e’lon qilingan. Kamera o‘rnatilgan joydan o‘rdak soatiga 52 kilometr tezlikda uchib o‘tgan — ushbu hududda harakat tezligi soatiga 30 kilometrgacha cheklangan.

Amaldorlarning ma’lum qilishicha, o‘rdak «retsidivist» bo‘lishi mumkin, chunki shunga o‘xshash o‘rdak bundan yetti yil oldin ham ushbu kamera obektiviga muhrlangan. U ham xuddi shu tezlikda uchib o‘tgan.

Mahalliy aholi suratni feyk hisoblab, rasmiylar bu orqali hazillashayotganini bildirgan. Ammo politsiyaning ta’kidlashicha, radar tizimidagi suratlarni o‘zgartirib bo‘lmaydi, chunki barcha kameralar har yili Shveytsariya metrologiya instituti tomonidan tekshiruvdan o‘tkaziladi.