Ehtiyoj ixtiroga yo‘l ochdi: nukuslik yigit o‘zi tebranadigan beshik yasadi

Qoraqalpog‘istonlik dasturchi yigitlardan biri o‘z rafiqasi va onasi chaqaloq farzandiga qarashda qiynalmasligi uchun o‘zi tebranadigan «smart-beshik» yaratdi. Bu uchun ixtirochi yigit 1 million so‘m xarajat qilgan.

Ixtirochi Sharapat Kalabayevning onasi Gulxan Qosjyeterovaning 7 nafar nevarasi bor. Sharapatning o‘zi IT sohasida faoliyat yuritadi. Ayni paytda ayaning ikki kelini talaba. U ba'zida nevaralariga qarashga ulgurmay qolardi. Shu sababli dasturchi o‘g‘li do‘sti yordamida unga «smart-beshik» yasab berdi.

{Yii::t(}

O'tkazib yuborish 6s

«7 nafar nevaram bor. Ularning ikkisi beshikda yotadi, chaqaloq. Ba'zan ularga qarashga ulgurolmayman, ikki kelinim ham talaba. Shundan keyin o‘g‘lim o‘zi chayqaladigan beshik yasab berdi. Yaxshi bo‘ldi, qo‘lim ancha uzaydi. Beshikni tokka qo‘shib, boshqa ishlarimni qilaveraman. Endi o‘g‘limdan beshikni sekin, tez va o‘rtacha chayqaladigan qilib berishini so‘rayman», deydi Gulxan Qosjyeterova.

O‘zi harakatlanadigan beshikni loyihalagan Sharapat Kalabayev va Muhammedsaqiy Turg‘anbayev uni 5 kun davomida yasab tugatgan. Beshik 12 volt tokda ishlaydi. TexnoPOS IT maktabida yaratilgan «aqlli» beshik maxsus tugmacha orqali harakatga keladi. Dastlabki variant biroz tez tebranadi, uni sekinroq tebranadigan qilish ham mumkin.

Bunday beshik hali O‘zbekistonda yaratilmagan. Beshikda qo‘shimcha 4 ta podshipnik, 1 ta quvvatlanish bloki bor. U «Nexia-2» avtomobilining oyna ko‘targich motori yordamida tebranadi.

Beshikni yasash uchun ixtirochilar 1 million so‘m sarflagan. Ular beshikka yangi funksiyalar qo‘shish ustida ishlamoqda. Rejaga ko‘ra, yangilanadigan beshik bolaning va uy haroratini ko‘rsatadi, o‘zi alla aytadi.