Bojxona qo‘mitasi eng ko‘p import qilinadigan mahsulotlarni onlayn ko‘rish imkoniyatini ishlab chiqdi

Bojxona qo‘mitasi matbuot xizmatiga ko‘ra, joriy yil avgust oyidan O‘zbekistonga eng ko‘p import bo‘layotgan iste’mol tovarlari ro‘yxati va hajmi haqida ma’lumotlar onlayn uzatila boshlandi.

Ma’lumotlar eng ko‘p import bo‘layotgan 31 guruhdan iborat 722 turdagi iste’mol tovarlari ro‘yxati va hajmini o‘z ichiga oladi. Ularni onlayn ravishda kuzatib borish imkoniyati mavjud.

Buning uchun bojxona qo‘mitasining rasmiy veb sayti – customs.uz’ga kirib, tovarlarning tashqi bojxona statistikasi bo‘limiga o‘tish kerak. Keyingi bosqichda iste’mol tovarlari importi qismi tanlanadi. Oynaning o‘ng tomonida joylashgan tugma yordamida hisobot davrini ko‘rsatish orqali import oziq-ovqat va nooziq-ovqat mahsulotlar ro‘yxati va hajmi bilan tanishib, kerakli bo‘lgan tovar guruhini tanlash yo‘li bilan ushbu tovarlarning qiymati va o‘sish dinamikasini ko‘rish mumkin. Barcha ma’lumotlarni excel formatida yuklab olish imkoniyati ham bor.

Qo‘mita matbuot xizmati rahbari (vazifasini bajaruvchi) Husan Tangriyevning Kun.uz’ga aytishicha, 2024 yilning 17 iyul kuni davlat rahbari boshchiligida o‘tkazilgan videoselektor yig‘ilishida eng ko‘p import qilinayotgan tovarlar haqida onlayn ma’lumot berish funksiyasini ishga tushirish borasida topshiriq berilgan.

“Tadbirkorlar O‘zbekistonga qaysi tovar eng ko‘p import qilinayotgani haqidagi ma’lumotlarni bilsin va shunga qarab biznesi, ishlab chiqarishini yo‘lga qo‘ysin degan maqsadda shunday funksiyani ishga tushirdik”, - dedi u.

Eng ko‘p eksport qilinayotgan tovarlar va davlat kesimida qaysi mahsulot qancha import qilinayotgani haqida ma’lumotlar hozircha mavjud emas. Husan Tangriyevning qo‘shimcha qilishicha, bu takliflar bildirilgan.

“Ko‘pdan beri tadbirkorlarning bunday ma’lumotlarga “dostupi” bo‘lmagan. Ma’lumotlar yanada kengayishi, qo‘shimcha ma’lumotlar qo‘shilishi mumkin. Davlatlar kesimida ham raqamlar ochiqlanishi mumkin”, - dedi u.