Xizmatdagi YPX xodimini videoga olib, tarmoqqa joylash – ma’muriy qamoq bilan tugadi

Jinoyat ishlari bo‘yicha Shahrisabz shahar sudi YPX inspektorining xizmat faoliyatini videoga olib, ijtimoiy tarmoqlarda obro‘sizlantiruvchi tarzda tarqatgan ikki fuqaroni Ma’muriy javobgarlik to‘g‘risidagi kodeksning 195-2-moddasi bo‘yicha aybdor deb topdi va ularga ma’muriy qamoq jazosi tayinladi.

Foto: Videodan kadr

Sudning 2025 yil 5 dekabrdagi qaroriga ko‘ra, 1988 yilda Qashqadaryo viloyatida tug‘ilgan M. M. hamda 1999 yilda Qashqadaryo viloyatida tug‘ilgan B. R. Ma’muriy javobgarlik to‘g‘risidagi kodeksning 195-2-moddasida nazarda tutilgan — huquqni muhofaza qiluvchi organlar xodimlarining foto va videotasvirini ularning obro‘sizlantirilishiga olib keladigan tarzda buzib tarqatish — huquqbuzarligini sodir etganlikda aybdor deb topilgan.

Tekshiruv va sud materiallariga ko‘ra, M. M. va B. R. jamoat xavfsizligini ta’minlash bo‘yicha Shahrisabz shahrida xizmat vazifasini bajarayotgan yo‘l-patrul xizmati inspektori T. X.ni atrofdagilar oldida obro‘sizlantirish maqsadida uni videotasvirga olib, mazkur tasvirni ijtimoiy tarmoqlarda tarqatgan.

Sud qaroriga muvofiq, M. M.ga 10 sutka, B. R.ga esa 7 sutka muddatga ma’muriy qamoq jazosi qo‘llangan.