Метро бекатида туғилган чақалоқ ва унинг онасига метро умрбод бепул бўлади

Метрода туғилган чақалоқ ва онасига умрбод метродан бепул фойдаланиш картаси берилади. Бу ҳақда Метрополитен ахборот хизмати хабар берди.

“Ғафур Ғулом бекатида чақалоқнинг дунёга келиши кўпчиликни ҳайратда қолдирди. Тошкент метрополитени раҳбарияти ушбу унутилмас ҳолат муносабати билан онага ва туғилган фарзандига бутун умр бепул метродан фойдаланиш ҳуқуқини берувчи махсус картани топшириши режалаштирилган. Бу совға метро ходимлари фидойилиги ва инсонпарварлиги тимсоли бўлиб, пойтахт Метрополитени тарихида алоҳида ўрин тутади”, дейилади хабарда.

Шунингдек, чақалоқ туғилишида биринчи ёрдам кўрсатган навбатчи ходима Наима Махамаджонова ҳамда жараёнда иштирок этган бир қатор метро ходимлари ҳам рағбатлантирилиши назарда тутилган.

“Мени кўпроқ жавобгарлик қўрқитди. Она ва болага ҳеч нарса бўлмасин, деган ҳаяжон бўлди. Бизга бекорга биринчи ёрдам кўратишни ўргатишмаган экан. Дунёга келган чақалоқ қизалоқ. Туғилганида кўкариб қолди. Бошида нафас олаётганини сезмадим. Озгина елкаларини ишқалаб кўрдик, онасининг бағрига қўйдик, сал кўзларини очгандай бўлди. Орқасига секин уриб қўйгандик, кейин йиғлашни бошлади. Овозини эшитгандан кейин хурсанд бўлиб кетдим. Киндигини кесолмадим, инфекция тушади деб қўрқдим. Лекин боғлаб қўйдим. Чунки боланинг соғлигига керак эди у нарса”, деган Наима Махамаджонова.

Ҳозирда она ва боланинг соғлиги яхши. Улар ўша вақтда шифохонага етказилган.

Кеча метронинг Ғафур Ғулом бекатида аёл фарзандини дунёга келтирганди.