Мопед ва скутер ҳайдаш учун гувоҳнома олиш осонлашади

Ўзбекистонда 2026 йил 1 январдан эътиборан “A1” тоифадаги ҳайдовчилик гувоҳномаси жорий этилади. Бу ҳақда ҳукумат қарори қабул қилинди

Қарорга кўра, миллий ҳайдовчилик гувоҳномасининг “А1” кичик тоифаси – мопед ва скутерларни, шунингдек, энг юқори конструктив тезлиги соатига 25 километрдан ошмайдиган, иш ҳажми 25 см3 гача бўлган ички ёнув двигателига эга бўлган ёки номинал (белгиланган) қуввати 0,25 киловаттгача бўлган кичик ҳажмдаги мототранспорт воситаларини (индивидуал ҳаракатланиш воситалари бундан мустасно) бошқариш ҳуқуқини беради.

“А1” тоифадаги ҳайдовчилик гувоҳномасини олиш учун автомактабда ўқиш шарт бўлмайди. Назарий ва амалий имтиҳонларни топшириш учун талабгорлардан ўқишни тугатгани ҳақида гувоҳнома талаб этилмайди. Улар ўз ихтиёрига кўра ўқув курсларида (онлайн ёки офлайн шаклда) ўқиши ёки мустақил тайёрланиши мумкин бўлади.

Бунда, назарий имтиҳонда 20 та тестдан камида 16 тасига тўғри жавоб берган “А1” тоифага номзодлар “назарий имтиҳонни топширган” деб ҳисобланади ва амалий имтиҳонга қўйилади.

1 январдан бошлаб, шунингдек,  “A”, “B”, “C”, “D” тоифадаги ҳайдовчилик гувоҳномасига эга шахслар “А1” кичик тоифадаги транспорт воситаларини бошқариш ҳуқуқига эга бўлади.

3 ой муддат ичида йўл ҳаракати қоидалари, транспортни бошқариш хавфсизлиги ва бошқа йўналишлар бўйича зарур билим ва кўникмаларни шакллантиришга кўмаклашувчи электрон ўқув материаллари ишлаб чиқилиши лозим. Бу материаллар барча учун очиқ бўлади.