Имом Бухорийнинг Пайариқдаги ёдгорлик мажмуасида 10 минг ўринли масжид қурилади - Шавкат Мирзиёев

Имом Бухорийнинг Пайариқ туманидаги ёдгорлик мажмуаси ҳозирги вақтда тубдан қайта қурилмоқда. Бу ҳақда президентликка номзод Шавкат Мирзиёев Самарқандда сайловчилар билан учрашувда айтиб ўтди.

“Бу ерда 21 гектар майдонда боғ ва хиёбонлар, 10 минг ўринли масжид, 3 та меҳмонхона, 24 та оилавий меҳмон уйларидан иборат, зиёрат туризми мажмуаси барпо этилади.

Ўзбек халқ оғзаки ижодини асраб-авайлаш ва келажак авлодларга безавол етказишда Эргаш Жуманбулбул ўғли, Фозил шоир, Ислом шоир, Пўлкан шоир каби атоқли бахши боболаримизнинг хизматлари беқиёсдир.

Уларнинг меросини чуқур ўрганиш ва тарғиб қилиш, жумладан, уй-музейларини таъмирлаш бўйича амалий чоралар кўришимиз зарур.

Келгуси йили Фозил Йўлдош ўғли таваллуд топганига 150 йил тўлади. Ушбу тарихий сана бўйича махсус қарор қабул қилиб, уни адабиёт ва маънавият байрами сифатида ўтказамиз. Чунки маънавий дурдонамиз бўлган “Алпомиш” достони айнан ана шу машҳур бахши тилидан ёзиб олинган”, деди Шавкат Мирзиёев.

Тайёрлаган: Отабек Матназаров

#Самарқанд #Шавкат Мирзиёев