Эшак гўштини истеъмол учун ишлатиладиган гўшт тоифасига киритиш назарда тутилмаган — Қонунчилик палатаси
Палата спикерининг ўринбосари Одилжон Тожиевнинг маълум қилишича, бундай тушунмовчилик палата томонидан тарқатилган матбуот хабарномасидаги таҳририй хато туфайли келиб чиққан. Кўриб чиқилаётган қонун гўшт истеъмоли ҳақида эмаслиги маълум қилинди. Нотўғри талқиндаги ахборот Қонунчилик палатасининг расмий каналидан, шунингдек, Kun.uz саҳифаларидан ҳам ўчирилди.
Олий Мажлис Қонунчилик палатаси спикерининг ўринбосари Одилжон Тожиев ҳайвонларни идентификация қилиш тўғрисидаги қонун билан боғлиқ тушунмовчиликка изоҳ берди.
Аввал хабар берилганидек, бугун, 17 сентябр куни Қонунчилик палатаси “Ҳайвонларни идентификация қилиш, рўйхатга олиш ва кузатиш тўғрисида”ги қонун лойиҳасини биринчи ўқишда кўриб чиқди.
Одилжон Тожиевга кўра, қонун лойиҳаси Қишлоқ хўжалик вазирлиги ҳузуридаги Ветеринария ва чорвачилик қўмитаси томонидан ишлаб чиқилган бўлиб, жорий йилнинг 5 август куни қонун ташаббускори томонидан Қонунчилик палатасига киритилган.
Қонун лойиҳаси билан жисмоний ва юридик шахслар томонидан сақланадиган (парвариш қилинадиган) ва урчитиладиган уй ҳайвонлари – қорамол, қўй ва эчки, чўчқа, от, эшак, туя, ит ва мушукларнинг идентификация қилиниши (визуал ёки электрон биркаларни ҳамда электрон микрочипларни ҳайвонларга ўрнатиш) назарда тутилган.
Таъкидланишича, лойиҳани кўриб чиқиш жараёнида депутатлар томонидан эшак, ит ва мушукнинг идентификация қилинишининг асослилиги бўйича эътирозлар билдирилган.
Эътирозлар қонун ташаббускорлари томонидан қабул қилиниб, лойиҳа биринчи ўқишда маъқулланган тақдирда, иккинчи ўқишга тайёрлаш жараёнида олиб ташланиши қайд этилган.
“Қонун лойиҳасида эшак гўштини истеъмол учун ишлатиладиган гўшт тоифасига киритиш назарда тутилмаган.
Умуман бу қонун гўшт истеъмоли ҳақида эмас, балки ҳайвонларни идентификация қилиш, рўйхатга олиш, кузатиш муносабатларини тартибга солади. Матбуот хабарномасидаги таҳририй хато туфайли тушунмовчилик келиб чиққан”, – дея маълум қилди Одилжон Тожиев.
Айни пайтда Қонунчилик палатасининг Telegram-каналидан тушунмовчиликка сабаб бўлган пост ўчирилган.
Мавзуга оид
16:54 / 17.09.2024
Ўзбекистонда чорва ҳайвонлари идентификация қилинади
19:51 / 06.09.2024
Ўзбекистонда ҳайвонларни ҳимоя қилишга чорловчи 224 млн сўмлик ролик тайёрланади. Маблағни халқаро ташкилот ажратган
19:01 / 25.06.2024
Бухорода аҳолига қоракўл қўйлари етказиб берилади, яйлов ва қудуқлар ажратилади
20:12 / 29.01.2024