Андижон шаҳри яқинида «Янги Андижон» массиви қурилади

Андижон – Ўзбекистонда аҳоли энг зич жойлашган шаҳарлардан. Шаҳарнинг ўзида ривожланиш учун бўш жой йўқ, дея хабар бермоқда президент матбуот хизмати.

Умумий майдони қарийб 4 минг гектар бўлган янги шаҳарнинг бош режасига кўра, у 1439 гектар турли қурилмалар, яъни уй-жой, савдо масканлари ва кичик саноат зонаси, 1820 гектар яшил ҳудуд, 223 гектарлик хизмат кўрсатиш ҳудуди ва 499 гектар йўллардан иборат бўлади.

«Энг муҳими, бу массив аҳоли уйлари бўлмаган, қишлоқ хўжалигида фойдаланилмайдиган бўш майдонда барпо этилади. Турар жой массиви қурилиши натижасида 411 минг нафар аҳоли яшаши мумкин бўлган янги шаҳарча пайдо бўлади.

Президент лойиҳа билан танишиб, уй-жойларни пухта ва сифатли лойиҳалаштириш, уни амалга оширишда маҳаллий мутахассисларнинг салоҳиятидан унумли фойдаланиш, унда имкон қадар кўпроқ яшил ҳудудлар, боғ ва хиёбонлар ташкил этилишини, аҳолининг дам олиши ва меҳнат қилиши учун қулай шароитларни назарда тутиш бўйича топшириқлар берди», – дейилади президент матбуот хизмати хабарида.

• Маълумот учун, 440 мингдан ортиқ аҳоли яшайдиган Андижон – аҳолиси зичлиги бўйича Ўзбекистондаги иккинчи шаҳар. 2021 йил бошида шаҳарнинг 1 кв.км ҳудудига 741 киши тўғри келган.
• Эслатиб ўтамиз, президент ўтган йили кузда Андижонга борганида, Асакада Asaka Сity қурилиши маълум бўлганди. «Ўзавтосаноат» қурадиган Asaka City қарийб 100 млн долларга тушиши хабар қилинганди.