Бугунги кунда Ўзбекистонда ҳам онлайн спорт турлари ривожланиб бормоқда. 2016 йилда Ўзбекистон электрон компьютер спорти федерацияси иш бошлаши бу соҳадаги дастлабки қадам бўлди. Федерациянинг бугунгача бўлган фаолияти, олиб борилаётган ва қилиниши керак бўлган вазифалар, ташкил этилаётган турнирлар, PlayStation ва компьютер ўйингоҳлари, Ўзбекистонда Киберспортни ривожлантириш истиқболлари тўғрисида федерация президенти Азиз Паттахов билан суҳбатлашдик.
«Ўзбекистон электрон компьютер спорти федерацияси ўз фаолиятини 2016 йилдан бошлаб, бугунги кунга қадар электрон компьютер спорти соҳасида бир қатор ишларни амалга ошириб келмоқда. 2018 йилдан эътиборан электрон компьютер спорти (киберспорт) расмий спорт турлар реестрида 100-спорт тури сифатида қайд этилди ва тан олинди. Федерациянинг киберспортчилари эса қисқа вақт ичида профессионал даражага чиқишга ҳамда жаҳон ва халқаро турнирларда муваффақиятли иштирок этишга эришишди.
Шунингдек, 2016 йилда республикамиз киберспорт тарихида энг йирик киберспорт аренаси ташкил этилди. «Uz Arena» номи остида ўз фаолиятини бошлаган ушбу арена жаҳон талабларига тўлиқ жавоб берувчи замонавий техникалар 50та компьютер, ва 24та PlayStation ҳамда катта Led-экранлар билан жиҳозланганди.
Ҳамма боланинг турлича нарсага иқтидори бўлади. Кимдир илм-фанга қизиқса, кимдир компьютер ўйинларида катта муваффақиятга эришиб, спорт юлдузи бўлиши мумкин. Фақат тўғри йўналтириш вазифасини биз бажаришимиз керак. Киберспорт орқали болаларни маълум мақсадга йўналтиришимиз мумкин. Бу фақат ўйин эмас, балки биз ҳам болаларга талаб қўямиз. Рус тили ва инглиз тилларини билиш талаб этилади. Чунки халқаро ареналарда мулоқот шу тилларда бўлади. Бундан ташқари, ўйин ишлаб чиқарувчи компаниялар ҳам ўйинларини инглиз ва рус тилларида чиқаради. Киберспорт тури Ўзбекистонда энди ривожланиб келяпти. Бу спорт тури орқали катта даромад топиш мумкин. Чунки халқаро мусобақаларда жуда катта совринлар қўйилади. Бундан ташқари, тадбиркорларимизни ҳам ҳамкорликка чақириб қоламиз. Улар учун махсус тизим ишлаб чиққанмиз. Бундан улар ҳам биз ҳам фойда кўрамиз.
Playstation хоналарда ичкилик, тамаки маҳсулотлари қатъиян тақиқланади. Бу спорт тури болаларнинг дарсига халақит бермайди. Чунки биз олдин болаларни ўқишини сўраймиз. Ўқиши яхшими? Бу спорт унга ҳалақит қилмайдими? Ва албатта, боланинг бу спорт тури билан шуғулланаётганини ота-онаси билиши керак. Болалар келажакда танлаш учун фақат 2-3та йўналиш билан чекланмаслиги керак. Айтайлик, ОТМга кира олмаган бола битта машинани ижарага олиб, таксичилик билан шуғулланиши эмас, агар қизиққан бўлса, профессионал даражада шуғулланиб, киберспорт билан ҳаётини қуриши мумкин. Бу спорт тури билан бизнес қилиш имкони ҳам мавжуд.
Бу спорт тури давлатга ва жамиятга ҳам фойда келтиради. Халқаро мусобақалар ўтказиб, дунёнинг турли бурчакларидан киберспорт ишқибозларини таклиф қилсак туризм ривожланади. Яқин ойларда «Ҳумо Арена»да киберспорт буйича катта халқаро турнир ташкиллаштиришни режалаштиряпмиз», дейди Азиз Паттахов.
Федерация президентидан олинган интервьюнинг тўлиқ талқини билан видеолавҳа орқали танишишингиз мумкин.
Видео: Youtube
Видео: Mover (tas-ix)
Ҳамкорлик қилмоқчи бўлганлар учун:
Esports Uzbekistan федерацияси
"UZ Arena" мўлжал Миллий (Бунёдкор) стадиони
Телегамм: t.me/esports_uzbekistan
(94) 606 73 33
(97) 429 73 33
