Тошкент туманида ит ёш болани ўлдириб қўяй деди. Унинг эгаси 370 минг жарима билан қутулиб кетади

Тошкент туманида ит ёш болани талади. Ҳолат 16 октябр куни соат 07:35 ларда туманнинг Сабзавот маҳалласида содир бўлган.

Онаси ва опаси билан кетаётган ёш болага кутилмаганда катта ит ташланиб қолган. У болани йиқитиб, устига чиқиб олган ҳолда талай бошлаган. Онанинг эса уни ҳайдашга кучи етмаган.

Шу пайтда йўлдан Damas автомобилида ўтиб кетаётган йўловчилар ёрдамга келиб, итни ҳайдашган.

“Одамлар ҳайвонларига жуда эҳтиёт бўлишлари лозим. Бундай ҳолатлар жиддий оқибатларга олиб бориши мумкин. Кеча маҳалла профилактика инспекторига мурожаат қилганимда ит эгасига нисбатан фақатгина 370 минг сўм жарима ундира олишини, бундан ортиғининг иложи йўқлигини билдирди”, деди Kun.uz’га боланинг отаси.

Таъкидлаш жоиз, Маъмурий жавобгарлик тўғрисидаги кодексининг 110-моддаси (ит ва мушук боқиш қоидаларини бузиш) 2-қисмига кўра, аҳоли пунктларида ит ва мушук боқишнинг қоидаларини бузиш фуқароларнинг соғлиғига зарар етишига олиб келса, фуқароларга БҲМнинг иккидан бир қисмидан бир бараваригача, мансабдор шахсларга эса бир бараваридан икки бараваригача миқдорда жарима қўлланади.

Яхшики, боланинг жароҳатлари жиддий эмас. Аммо шу ҳодисада жиддийроқ оқибат келтириб чиқарса нима бўларди? Афсуски, оқибати ҳар қанча жиддий бўлмасин итни эгаси ўша арзимас жарима билан қутулиб қолаверади.

Жиноят кодексида ҳайвонларга нисбатан шафқатсиз муносабатда бўлиш учун жавобгарлик бор. Бироқ ҳайвонларнинг (шу жумладан уй ҳайвонларининг) одамларга нисбатан шафқатсизлиги учун уларнинг эгаларига нисбатан ҳеч қандай жазо йўқ. Шундай экан, уй ҳайвонларини боқаётган фуқароларнинг масъулиятини ошириш учун жавобгарликни кучайтириш ҳақида ўйлаб кўриш фойдадан холи бўлмайди.