Трамп уни Россиянинг дўсти дейдиганларни «хаста» деб атади

Республикачилар партиясининг АҚШ президентлигига номзоди Доналд Трамп Аризонадаги Глендейл шаҳридаги стадионда телебошловчи Такер Карлсонга интервю берди ва уни Россиянинг дўсти дейдиганларни «хаста» деб атади.

«Улар [демократлар] мен Россиянинг дўсти бўлганим, мен Россияга ишлаганим, мен Россияга жосуслик қилганим ҳақида гапиришни ёқтиришади. Бу одамлар хаста», — деган  Трамп.

У Россиянинг энг йирик лойиҳаси бутун Европа орқали Германияга ўтказилган «Шимолий оқим — 2» газ қувури бўлганини айтади. «Мен уни яксон этдим. Буни ҳеч ким қилмаганди, мен эса қилдим. мен уни тўхтатдим. <…> Шундан кейин эса мен Россиянинг қўғирчоғи бўлганим ҳақидаги эртакни ўқишда давом этаман», — деган Трамп.

Унинг сўзларига кўра, унинг Россия билан алоқаси ҳақидаги гапни демократлар 2016 йилда, у сайловда Ҳиллари Клинтонни енгганида ўйлаб топишган, шундан кейин эса гўёки Америка нашрлари бу маълумотни илиб олган.

Бундан ташқари, республикачилар номзоди Хитой ва Россияни «ажратиш»ни ўзининг вазифаси сифатида келтирган. «Байден уларни бирлаштирган. Бу шармандалик. Мен уларни ажратишимга тўғри келади. Ўйлайманки, буни уддалай оламан», — деб ҳисоблайди у.

Трамп ўз президентлиги даврида бир неча бор Германияни «Шимолий оқим — 2» қурилиши билан шуғуллангани учун танқид қилган, шунингдек, Москва билан олдинги муносабатларни тиклашга қарши чиққанди. Жумладан, қурилиш ишларида иштирок этган немис компанияларига қарши санкциялар қўллаш билан таҳдид қилганди.

• АҚШдаги президентлик сайловлари 5 ноябр куни бўлиб ўтади. Трамп сайловолди кампанияси давомида бир неча бор Россия ҳамда Владимир Путин билан муносабатларини тилга олди. У Путинга Украинага ҳужум қиладиган бўлса, Москва бўйлаб зарба бериш билан таҳдид қилганини эслатган, шунингдек, кўп марта агар президент у бўлганида, Россия ва Украина ўртасидаги урушга йўл қўймаган бўлишини такрорлаган. Шунингдек, президентликка сайланса, лавозимига расман киришишдан олдинроқ Россия-Украина урушига барҳам беришини билдирган.
• 2022 йил кузида Болтиқ денгизидаги «Шимолий оқим — 1» ва «Шимолий оқим — 2» газ қувурларида портлашлар рўй бериб, жами тўрт тармоқдан учтаси шикастланган. Шу тариқа, газ қувури амалда бутунлай ишдан чиққан. Ғарб нашрлари тергов маълумотларига таяниб, газ қувурини портлатиш бўйича амалиёт 2022 йил майида украиналик зобитлар гуруҳи томонидан ўйлаб топилганини хабар қилган. Аввалига режани шахсан Володимир Зеленский маъқуллаган, аммо Марказий разведка бошқармаси бундан хабар топиб, амалиётни ўтказишни бекор қилишни сўраган. Аммо у барибир амалга оширилган. Портлашни амалга оширишда Украина фуқаролари гумонланган.