Binance Ўзбекистонда жарима тўлашдан бош тортган. Иш судга оширилади

Дунёдаги энг йирик криптовалюта биржаси – Binance Ўзбекистонда лицензиясиз фаолият юритгани учун белгиланган жаримани тўламаган. Бу ҳақда Истиқболли лойиҳалар миллий агентлиги директори ўринбосари Вячеслав Пак маълум қилди.

“Офшор зонада рўйхатдан ўтган Binance'ни Ўзбекистонда лицензиясиз фаолият юритгани учун жаримага тортгандик. Кутганимиздек, улар жарима тўлашдан бош тортди. Шунинг учун Ўзбекистон Республикаси қонунчилигидан келиб чиқиб, судга даъво билан мурожаат қиламиз ва тегишли қарор қабул қилинади”, – деди Пак 6 феврал кунги матбуот анжуманида.

Унинг айтишича, суд қарори расмий каналлар орқали Binance рўйхатдан ўтган юрисдикцияга ижро этиш учун юборилади ва биржа Ўзбекистон қонунчилиги талабларига мувофиқ ишлаши таъминланади.

Истиқболли лойиҳалар миллий агентлиги Binance'ни Ўзбекистон тегишли провайдер лицензиясини олиш бўйича тегишли чоралар кўрмагани учун январ ойида 300 БҲМ – 102 млн сўм миқдорида жаримага тортганди.

Бундан ташқари, криптобиржа фаолиятида бир қанча қонунбузарликлар аниқланган. Binance платформасида операциялар аноним крипто-активлар, шунингдек, жиноий йўл орқали олинган крипто-активлар ва маблағлар (ўғрилик, фирибгарлик ва бошқалар) билан амалга оширилгани, компания юридик шахс – Ўзбекистон Республикасининг резиденти эмаслиги, Ўзбекистон Республикаси ҳудудида жойлашган серверларда электрон платформа мавжуд эмаслиги шулар жумласидан.

Шу билан бирга, биржа Ўзбекистон Республикасининг крипто-активлар айланмаси соҳасидаги, шунингдек жиноий фаолиятдан олинган даромадларни легаллаштиришга, терроризм ва оммавий қирғин қуролларини тарқатишни молиялаштиришга қарши курашиш, шунингдек, шахсий маълумотларни сақлаш ва улардан фойдаланиш соҳасидаги қонун ҳужжатларининг талабларига риоя этмаганликда айбланган. Бир қисми Ўзбекистон Республикаси тижорат банкида алоҳида ҳисобварақда сақланиши зарур бўлган устав жамғармаси (капитали) мавжуд эмаслиги ҳам маълум қилинганди.