Мактаб электрон кундалиги қанча туради: 20 000 ёки 8600 сўм?

Мактабларда янги ўқув йили бошланиши билан қўшимча “йиғим”ларга ҳам старт берилади. Харажатлар ичида электрон кундалик тўлови ҳам бор. Таҳририятга қилинган қатор мурожаатларда электрон кундалик нархи асоссиз ошириб юборилаётгани айтилмоқда. Бир ўқувчи учун 20 000 сўмгача талаб қилинмоқда. Электрон кундаликнинг расмий нархи қанча?

Ушбу масала юзасидан Халқ таълими вазирлигига мурожаат қилдик. Вазирлик матбуот котиби Лайло Рустамованинг маълум қилишича, электрон кундалик учун расмий белгиланган тўлов – бир ўқувчи учун бир календар йилга (365 кунга) 8 600 сўм.

Электрон кундаликка қўшимча Kundalik.Family иловаси ҳам ишлаб чиқилган бўлиб, у ота-оналар ва ўқувчилар учун мўлжалланган. У ерга Kundalik сайтида рўйхатдан ўтган логин ва пароль орқали кирилади. Ўқувчи кундалиги учун бир йиллик тўлов – 8600 сўм тўланган бўлса, Kundalik.Family иловаcида барча маълумотлар очилади ва кўриниб туради. Илова барча фойдаланувчилар учун 30.11.2021 йилгача бепул тақдим этилган ва у учун алоҳида тўлов ўтказиш талаб этилмайди.

Ота-оналар ва ўқувчилар электрон кундалик қанча туриши, қандай қилиб тўлов ўтказиш мумкинлиги ҳақида kundalik.com орқали батафсил маълумот олишлари мумкин. Электрон кундаликни фақат www.kundalik.com веб-сайтидан ва ота-она ёки ўқувчи профилидан сотиб олиш мумкин. Ота-оналар етарли маълумот олишлари учун қўллаб-қувватлаш хизмати +998 (78) 888-82-82 рақамига қўнғироқ қилиб ёки [email protected] электрон почта манзилига мурожаат қилишлари мумкин.