Андижон сув омбори сув ресурслари Қирғизистон ва Ўзбекистон қўшма комиссияси томонидан бошқарилади.
Қирғизистон президенти Садир Жапаров «Қирғизистон Республикаси Вазирлар Маҳкамаси ва Ўзбекистон Республикаси Ҳукумати ўртасида 2022 йил 3 ноябрда Бишкекда имзоланган Кампиробод (Андижон) сув омбори сув ресурсларини биргаликда бошқариш тўғрисидаги битимни ратификация қилиш ҳақида»ги қонунни имзолади.
Ҳужжатда 3 ноябр куни Бишкекда имзоланган Кампиробод (Андижон) сув омборининг сув ресурсларини биргаликда бошқариш тўғрисидаги икки давлат ўртасидаги келишувни ратификация қилиш таклиф этилган.
«Шартнома Қирғизистон Республикаси ва Ўзбекистон Республикаси ўртасида Қирғизистон-Ўзбекистон давлат чегарасининг айрим участкалари тўғрисидаги битимга мувофиқ тайёрланган. Унинг мақсади қўшма комиссия томонидан сув омбори сув ресурсларини бошқаришдир», — дейилади президент матбуот хизмати хабарида.
Бу қонун билан сув омбори жойлашган ҳудуд Ўзбекистонга тегишли экани ҳақидаги баҳсларга барҳам берилади, омбор икки давлат томонидан ҳамкорликда бошқарилади.
Жапаров шу куни ўзбек-қирғиз давлат чегарасининг 302,29 км узунликдаги участкаларига доир шартномани ратификация қилиш бўйича қонунни ҳам имзолади.
Аввалроқ Ўзбекистон бош вазири Абдулла Арипов чегара битими тафсилотларини маълум қилган эди.