Ўзбекистон Италиядан сунъий интеллект билан ишлайдиган агротехнологияларни харид қилади 

Юзлаб италян компаниялари вакиллари Тошкентда Марказий Осиё ва Озарбойжондан келган бизнес доиралари билан кўришди. Ўзбекистон эса Италиядан сунъий интеллект билан ишлайдиган агротехнологияларни харид қилмоқчи. Илм-фан ютуқларини тезлик билан қишлоқ хўжалигига кўчиришгани сабаб катта натижаларга эришишмоқда, дейди ОАВ билан гаплашган қишлоқ хўжалиги вазири Иброҳим Абдураҳмонов.

Шу ҳафта Тошкентда “Италия–Марказий Осиё–Озарбойжон” бизнес форуми бўлиб ўтмоқда. Юзлаб италян ва бу минтақадаги компаниялар вакиллари Тошкентда жиддий келишувларга эришмоқда. Халқаро форум бу гал қишлоқ хўжалигида ресурсларни тежовчи, экологик барқарор ва юқори самарали ишлаб чиқаришни йўлга қўйиш тажриба алмашишни мақсад қилган.

 Италияда ҳам қурғоқчилик, лекин шундай шароитда илм-фан ютуқларини қишлоқ хўжалигига жорий қилишгани сабаб катта ютуқларга эришишмоқда, дейди Ўзбекистон қишлоқ хўжалиги вазири Иброҳим Абдураҳмонов. Вазир сўзида давом этаркан, Ўзбекистоннинг Италиядан ўрганадиган жиҳатлари кўплигини қўшимча қилди. 

Қишлоқ хўжалигида бугун энг катта вазифалардан бири – соҳани инвестициявий жозибадор қилиш, қайта ишлаш саноатини ривожлантириш, экспорт занжирларини мустаҳкамлаш ва албатта, қўшма корхоналарни йўлга қўйиш. 

Италия савдо агентлиги президентига кўра, Марказий Осиё ва Озарбойжонга аллақачон 2.5 млрдлик экспорт бор. Бу давлатлар, хусусан, Ўзбекистон эса шу кунларда Италиядан юқори сифатли ва сунъий интеллект билан жиҳозланган агротехнологияларни харид қилмоқчи. 

“Биз Италиядан 100 га яқин ташкилотни олиб келдик, уларнинг 60 га яқини ишлаб чиқарувчилардир. Ва биз уларни 200 га яқин маҳаллий ташкилот ва тадбиркорлар билан учраштирдик. Натижада эса ишлаб чиқарувчилар ва маҳаллий мижозлар ўртасида камида 450 та бизнес учрашувлари бўлиб ўтди. Шундай қилиб, айтиш мумкинки, биз Италия ва ушбу минтақа, яъни Марказий Осиё ва Озарбойжон билан ҳам савдомизни жадаллаштириш механизмини яратдик”, дейди агентлик президенти Маттео Зоппас. 

Агар адашмаётган бўлсам, бу мамлакатлар сизнинг қишлоқ хўжалиги техникангиз ва технологияларингизни кўпроқ сотиб олишга ҳаракат қилмоқда, шундайми? Ва уларнинг талаблари қандай? 

“Уларнинг талаблари асосан механизациялаш, рақамлаштириш, шунингдек, нафақат техниканинг ўзида, балки дастурий таъминот ва учинчи томон иловаларидан фойдаланишда ҳам сунъий интеллектни қўллашга қаратилган. Шунингдек, биз ер учун воситалар, ирригация ҳақида ҳам гаплашяпмиз. Тобора муҳим аҳамият касб этаётган озиқ-овқат хавфсизлигини таъминлайдиган ва кучайтирадиган барча маҳсулотлар ҳақида сўз юритяпмиз. Шундай қилиб, биз ушбу учрашувга кела олган барча компанияларни олиб келдик ва яқин келажакда бир томондан 2,5 миллиардлик экспорт ҳажмини ошириш учун янада кўпроқ компанияларни жалб қиламиз деб ўйлаймиз. Сиз учун мавжуд технологиялар даражасини оширишга бўлган қизиқишингизни қондириш бизнинг ҳам манфаатларимизга мос келади” – Маттео Зоппас – Италия савдо агентлиги президенти. 

Қишлоқ хўжалиги вазири Иброҳим Абдураҳмоновнинг қўшимча қилишича, дунёдаги нотинчлик сабаб озиқ-овқат маҳсулотларининг нархи тинимсиз ўсиб бормоқда ва бу жиддий хавф. 

Халқаро форум сўнгида Ўзбекистон ва Италия ўртасида қишлоқ хўжалиги савдосини ривожлантириш, инвестицияларни рағбатлантириш ва агросаноат ҳамкорлиги тўғрисида битим имзоланди.