Италия ўзбекистонликларни мавсумий ишга қабул қилади

Миграция агентлиги раҳбари Беҳзод Мусаев, қишлоқ хўжалиги вазири Иброҳим Абдураҳмонов, Италия қишлоқ хўжалиги вазири Франческо Лоллобрижида ҳамда Confagricoltura ташкилоти вакиллари иштирокида ўтказилган учрашувда фуқароларни Италиянинг аграр соҳасига ишга жалб этиш бўйича муҳим келишувларга эришилди.

Хусусан, Ўзбекистон Миграция агентлиги ҳамда Италиянинг Associazione Imprese Ortofrutticole ташкилоти ўртасида ҳамкорлик битими имзоланди. Унга кўра, ўзбекистонликлар Италияга 3 ойдан 9 ойгача бўлган муддатга мавсумий ишларга юборилади.

Қайд этилишича, мазкур ассоциация Италиянинг мева-сабзавотчилик йўналишидаги 35 дан ортиқ йирик компаниясини бирлаштиради. Тузилма фермерлик, қайта ишлаш, логистика ва экспортгача бўлган тўлиқ агросаноат занжирини қамраб олади. Асосий маҳсулотлар сифатида олма, киви, анор ва қулупнай каби мевалар тилга олинган.

Шунингдек, ассоциация президенти Марко Салви жорий йилда пилот лойиҳа доирасида 100 нафар ўзбекистонликни иш билан таъминлашга тайёр эканини билдирган. Бу эса Италия меҳнат бозорида ўзбекистонликлар учун янги йўналиш очилаётганини кўрсатади.

Очиқ манбаларда келтирилишича, Италияда мавсумий ишга бориш учун иш берувчи томонидан рухсатнома расмийлаштирилиши, сўнгра мавсумий иш визаси олиниши талаб этилади. Бундай иш рухсатлари, одатда, Италиянинг йиллик квота тизими асосида берилади.

Янги келишув Ўзбекистон фуқаролари учун хорижда қонуний меҳнат қилиш имкониятларини кенгайтиришга хизмат қилиши, шу билан бирга, мавсумий бандлик орқали даромад топиш ва халқаро меҳнат тажрибасини оширишга замин яратиши кутилмоқда.