Исломнинг икки муқаддас масжидида таровиҳ намози қисқартириб ўқилади

Масжид Ал-Ҳаром ва Масжид Ан-Набавий ишлари бўйича бош котиб, шайх Абдураҳмон бин Абдулазиз Ас-Судайс баёнотига кўра, икки масжидда ҳам таровиҳ намозлари ўқилади. Аммо унда фақат ҳукумат вакиллари ва ходимлар иштирок этади. Намоз фақат 10 ракаатдан иборат бўлади.  

Шунингдек, коронавирус пандемияси шароитида Рамазон ойини ўтказиб олиш бўйича қўшимча тадбирлар ҳам эълон қилинди.

Ҳозирги вақтда, Масжид Ал-Ҳаром ва Масжид Ан-Набавийга мусулмонларнинг кириши тақиқлаб қўйилган. Шунингдек, ҳар бир ходим ва жаноза маросимига келаётганларнинг ҳарорати мунтазам равишда ўлчаниб, дезинфекция қилинмоқда.

Рамазон ойида Масжид Ал-Ҳаром ва Масжид Ан-Набавийда анъанавий тарзда ўтказиладиган ифторликлар бўлмайди. Унинг ўрнига Макка ва Мадина шаҳарлари маъмурияти ифторлик учун мўлжалланган озиқ-овқатларини муҳтожларга тарқатади.

Хавфсизлик чоралари доирасида ҳар иккала муқаддас масжидда Эътикоф амали қилинмайди.

Ҳар иккала масжидга фақат жуда муҳим ходимларнинг киришига рухсат берилади. Уни тозалаш ва таъмирлаш ишлари хавфсизлик чораларини кўрган ҳолда амалга оширилади.

Саудия Арабистони муфтийси аҳолига таровиҳ ва Ийд ал-Фитр (ҳайит) намозларини фақат уйда ўқиш ҳақида кўрсатма берди. Аввалроқ, коронавирус пандемияси туфайли масжидлардаги барча жамоат намозлари тўхтатилган эди.

Шунингдек, Рамазон ойи туфайли, ҳукумат комендантлик соати бўйича енгиллик берди. Фақат зарур ҳолларда уйдан чиқиш мумкин бўлган вақт соат 9:00 дан 17:00 гача қилиб белгиланди (олдин 9:00 – 15:00 эди).

Саудия Арабистони соғлиқни сақлаш вазирлиги маълумотига кўра, мамлакатда коронавирус юқтириб олганлар сони 11631ни, вафот этганлар сони 109ни, соғайиб кетганлар сони 1640ни ташкил қилади.