1 апрелдан фойда солиғи бўйича айрим солиқ имтиёзлари бекор бўлади

2021 йил 1 апрелдан бошлаб президентнинг 2007 йилда қабул қилинган «Ишлаб чиқаришни модернизациялаш, техник ва технологик қайта жиҳозлашни рағбатлантиришга оид қўшимча чора-тадбирлар тўғрисида»ги фармони ўз кучини йўқотади.

Ушбу санадан бошлаб унда назарда тутилган солиқ имтиёзларининг амал қилиши тўхтатилади. Хусусан, хўжалик юритувчи субъектларнинг 5 йил мобайнида ишлаб чиқаришни кенгайтиришга, ушбу мақсадлар учун берилган кредитларни сўндириш харажатларига ҳамда лизинг объекти қийматини тўлашга йўналтирилган инвестиция суммаларига фойда солиғи бўйича солиқ базасини камайтириш ҳуқуқига доир имтиёз бекор қилинади.

Маълумот учун, янги таҳрирдаги Солиқ кодексида фойда солиғи доирасида қуйидаги миқдорлардаги инвестициявий чегирма назарда тутилган:

• янги технологик ускуналар қийматининг, ишлаб чиқаришни модернизация қилиш, техник ва (ёки) технологик жиҳатдан қайта жиҳозлаш харажатларининг ва (ёки) ахборот тизимларини яратишга доир инвестиция лойиҳалари доирасида маҳаллий ишлаб чиқаришнинг дастурий таъминотини сотиб олишга йўналтириладиган маблағлар суммаларининг 10 фоизи миқдорида;
• ишлаб чиқаришни янги қурилиш шаклида кенгайтиришга, ишлаб чиқариш эҳтиёжлари учун фойдаланиладиган бинолар ва иншоотларни реконструкция қилишга йўналтириладиган маблағлар суммасининг 5 фоизи миқдорида.

Солиқ кодекси 317-моддасига мувофиқ, чегириб ташланмайдиган харажатлар бўйича инвестициявий чегирма берилмайди, у қуйидагилар амалга оширилган ҳисобот (солиқ) даврида қўлланилади:

• янги технологик ускуна ишга туширилган;
• ўз ишлаб чиқаришини модернизация қилиш, техник ва (ёки) технологик жиҳатдан қайта жиҳозлаш амалга оширилган, ишлаб чиқариш янги қурилиш шаклида кенгайтирилган, ишлаб чиқариш эҳтиёжлари учун фойдаланиладиган бинолар ва иншоотларни реконструкция қилиш амалга оширилган, ахборот тизимларини яратиш бўйича инвестиция лойиҳалари доирасида маҳаллий ишлаб чиқаришнинг дастурий таъминоти сотиб олинган.

Aввалроқ, Молия вазирлиги Солиқ кодексига ўзгартириш киритиш тўғрисидаги қонун лойиҳасини жамоатчилик муҳокамасига қўйгани ва унда электромобиллар божхона йиғимидан озод этилиши кўзда тутилгани хабар қилинган эди.