Тренддаги гап: “Кореяда $3-5 минг топса бўларкан!?”

Жанубий Корея сўнгги йилларда ўзбекистонлик ёшлар учун таълим олиш, тажриба орттириш ва янги имкониятлар эшигини очаётган мамлакатлардан бирига айланди. Бироқ Кореяда ўқиш нафақат орзулар, балки молиявий қийинчиликлар ва кундалик курашни ҳам англатади. Kun.uz Кореяда ўқиётган ўзбек ёшлари ҳаёти, уларнинг изланишлари, ютуқлари ва реал тажрибалари билан яқиндан танишди.

Моҳичеҳра Баҳромова, талаба:

“Агар 5 йил олдин менга кимдир “Кореянинг ТОП-10 талик университетини қизил дипломга битириб, Сеул марказида таржимон сифатида ишлайсан” деса кулган бўлардим. 2003 йил Марғилон шаҳрида туғилганман, оиламизда ҳамма педагоглар бўлганлиги сабабли ўқишимга ва тил ўрганишимга катта эътибор қаратилган. Шунинг учун кичкиналигимдан рус, немис тилларини бемалол гапириб ўрганганман. Корейс тилига бўлган қизиқишим эса ўша пайтда машҳур бўлган “Тангем” сериали орқали пайдо бўлган. Бош қаҳрамонга қараб Кореянинг маданияти, урф-одатлари бизникидек ранг-баранг, қизиқарлилиги эътиборимни тортган. Ҳозир бешта тилда гапираман, қўшимча испан ва араб тилларини ўрганяпман. Тиллар ичида корейс тили менга осон ва қизиқарли туюлган. Китоблар орқали ўрганганман.

Ўша пайтда Кореяга кетиш ёки Ўзбекистонда бирор университетга кириш танлови бўлган, лекин мен оилам билан бирга бўлишни хоҳлаганлигим учун ватанда қолишга ҳаракат қилганман. Кейинроқ Кореяга кетиш имкониятини берадиган Тошкент Кимё халқаро университетига кирганман. Ўқишга кирган пайтим корейс тилини яхши билганим учун менга дарслар жуда осон бўлиб туюлган. Лекин 2-курсдан корейс профессорлар бизга дарс ўта бошлашгани сабабли дарслар янада қизиқарли бўлди.

Ўқиш давомида турли конкурслар, танловларда иштирок эта бошладим, буни бошқаларгаям маслаҳат бераман. Чунки Кореядаги университетларда шундай сертификатлар, ҳар хил кўнгилли сифатида қилинган ишлар жуда инобатга олинади. Менгаям булар катта ёрдам берган.

Кореяга келгач ўқиш билан бирга 50дан ортиқ жойларда ишлаш учун ариза юбордим, лекин олишмади. Шунда бир клиникага таржимон керак бўлди ва рус, корейс тилларини билганим учун ишга олишди. Биринчи оддий стоматология клиникасида, кейинроқ стоматология, офтолмология, пластик жарроҳлик клиникаларида ўзбек, рус, корейс таржимони сифатида ишлаяпман”.

Шаҳзод Абдураҳмонов, талаба:

“Андижонда туғилганман, отам ҳарбий бўлганликлари учун кўп вилоятларда яшаганмиз. Тошкентда яшаганимизда корейс тилини ўргандим. Лекин биринчи йили ўқишга кира олмаганим жуда қаттиқ зарба бўлди. Кейинги йили тайёрланиб Тошкент Кимё халқаро университетига кирдим. У ерда Кореяда 2 йил, Ўзбекистонда 2 йиллик дастур асосида ўқитилади. Кореяга кетиш учун биринчи навбатда грантларга эътибор бера бошладим. Шундан кейин 4 йиллик грант ютиб олдим. Бу ерда дарс жадвалини ўзингиз тузасиз. Бунинг келибоқ рўйхатдан ўтиш керак экан – мен келгунимча бу мавсум тугаб қолган экан. Шунда корейслардан ёрдам сўрашга мажбур бўлдим.

Кореяда ўқишдан ташқари яна бир муаммо бор – 100%лик грантим бўлсаям яшашга етмай қолади. Ижара учун ўртача 320 доллар ҳисобланади. Ётоқхонада яшадим бошида, у ерда овқат тайёрлаш ноқулайлиги сабаб кўчадан сотиб олганмиз. Битта нон 25 минг сўм бўлса, қолган харажатлар ҳам ўзига яраша катта. Шунинг учун бу ерда тахминимча, 90 % талабалар ишлашади. Менам шулар орасидаман. Кўп жойларда ишлаб кўрдим. Биринчи бўлиб юк ташишда ишладим – 20 килодан. 3 кун ишладим, “бўлди бошқа бу ишда ишламайман” дедим. Лекин 3 кундан кейин пулим тугади. Яна чиқдим – пул яхши тўлашади, оғир иш ва ҳар куни ҳам иш бўлавермайди. Кейин шкаф ясадик, идиш-товоқ ювдим, овқат пиширишга кирдим, ресторанда ишладим. Охири тушундимки, ақлий меҳнат яхшироқ экан. Шундан кейин корейс тилидан дарс беришни бошладим. Покистонликларга инглиз тилида корейсчани ўргата бошладим. Натижалар зўр бўлди, ўқувчиларим 40тадан ошиб кетишди. Онлайн тарзда ўзбеклар учун курс очдим. Ҳозиргача 2 йил ичида 4000га яқин талабани ўқитдим”.

Фарангиз Сафарова, талаба:

“Кореяда яшаш фақат ўқиш дегани эмас. Бу ерда харажатлар жуда кўп бўлади ва сиз грандда ўқисангиз ҳам барибир уйдан пул олишингизга тўғри келади. Ўқишниям эплашим керак, қўшимча ишим ҳам бўлиши керак деб ўйладим. Талабалар учун 20 соатгача ишлаш мумкин. Дарсдан ташқари қўшимча иш қиламан, Ўзбекистондаги талабаларга онлайн дарс ўтаман. Булар яшаш харажатларимга бемалол етади. Ишниям, ўқишниям ўз вақтида эплаш керак, акс ҳолда бу дарсларига катта таъсир қилади. Бу қийин бўлиши мумкин, лекин улгурса бўлади”.

Жамшид Йўлчиев, талаба:

“Мактаб пайтида корейс ёзувларини ёқтирардим, тушунмасам ҳам ўзимча ёзиб ўтирардим. Кейин коллежга кирдик, ўша даврларда трендга чиққан гап “Кореяда 3000-5000 $ топса бўларкан” деган гапларни эшитганда озроқ қизиқиш бўларди.

Кореяга кетаман деган пайтда карантин бошланди. тайёрланиб Тошкент Кимё халқаро университетига ҳужжат топширдим, менда ўшанда TOPIK5 сертификати бор эди. Келгунимда қадар Корея ҳақида “пушти” кўзойнакни ечгандим, билардим қийинлигини. Янги жой, кўчалар қанақадир файзсиз, бегоналар... Энг ёмони интернет орқали хонадош топганман. Киришим билан жудаям тартибсизликка кўзим тушди. Мен энг ёқтирмаган нарсам – тартибсизлик. Тартибсизлик бўлган жойда тартибли ўйлаш имконсиз. Хона шунақа чанг ва тўла эдики, ўтиришга жой топилмасди. Қаерга келиб қолдим деб ўйлай бошладим. Ўша пайтда қайтиб кетиш ниятим ҳам бўлди.

Лекин яшаган сари мамлакатнинг яхши тарафларини кашф қила бошладим. Албатта, Ўзбекистон билан Кореяни солиштирмаслик керак. Иккала мамлакат ҳам ўзига хос”.

Айтиш керакки, ушбу талабаларнинг барчаси Тошкент Кимё халқаро университетининг 2+2 дастури орқали Кореяда ўқишни давом эттиришяпти ва ишлашяпти. Университетда 28 таълим йўналишида таҳсил берилади. Маълумотларни эса расмий саҳифалар орқали олиш мумкин.

Web-page | Telegram | Facebook | Instagram