Германия компаниялари Россияга газ учун янги схема бўйича тўлай бошлади 

Германиянинг иккита энергетика концерни - Uniper ва RWE Россия гази учун тўлов тизимини ўзгартирди. Биринчи тўлов май ойи охирида амалга оширилди, пул «янги тўлов механизмига мувофиқ еврода ўтказилмоқда», дея хабар берди Uniper 31 май, сешанба куни. Ширкат тафсилотларни очиқламаган. 

«Бу тартиб Германия ҳукумати билан олдиндан келишилган ва Европа иттифоқининг тегишли кўрсатмаларига амал қилинган, бунда шартнома мажбуриятларини бажариш имкони бор», - дея таъкидланади Россия газининг Германиядаги энг йирик харидори хабарида. 

Ўз навбатида, Германияда электр энергияси етказиб берувчи энг йирик RWE компанияси ҳам янги қоидаларга мувофиқ тўлов усулини ўзгартиргани ва Россия ҳисобига евро ўтказганини маълум қилди. Аввалроқ компания келгуси тўловлар учун Россияда евро ҳисобрақами очилганини билдирганди. 

Аввалроқ, 31 март куни Владимир Путин «Газпром»га «дўстона бўлмаган» мамлакатлар компанияларидан газ учун тўловларни фақат рублда қабул қилишни буюрган эди. Хорижий компаниялар «Газпромбанк»да валюта ва рублда иккита ҳисобрақам очишлари керак эди. Газ харидори чет эл валютасини валюта ҳисобварағига ўтказиши керак, кейин «Газпромбанк» Москва биржасида валютани сотгандан сўнг, тушумни рубль ҳисобварағига ўтказади. 

Апрель ойи охирида Еврокомиссия раиси Урсула фон дер Ляйен агар шартномаларда кўзда тутилмаган бўлса, «рублдаги тўловлар санкцияларни бузиш ҳисобланади», деб айтганди. Европа иттифоқида «Газпромбанк»да иккита ҳисоб очиш схемаси ҳам Россияга қарши санкцияларга зид деб кўрилмоқда. 

Брюссел компанияларга Россия банкидаги ҳисобрақамига евро ёки долларда тўловларни амалга оширишни ва бундай ўтказмадан сўнг шартнома мажбуриятларини бажаргани ҳақида аниқ баёнот беришни тавсия қилди. Компаниялар фақат иккинчи, рублда ҳисобрақам очса, муаммоларга дуч келиши мумкин.

30 май куни Россия газ ширкати янги схема бўйича рублда газга тўлашдан бош тортгани муносабати билан 1 июндан Британия-Нидерландиянинг Shell Energy ва Даниянинг Orsted компаниясига газ етказиб беришни тўхтатганини маълум қилди. Нидерландияга етказиб бериш тўхтатилгани ҳам маълум бўлди. Аввалроқ Россия бир томонлама равишда Полша, Болгария ва Финландияга газ етказиб беришни тўхтатган эди.