Германия, Франция ва Британия Россиянинг “Орешник” ракета зарбасини қоралади

Берлин, Лондон ва Париж Россиянинг Украинага қилган ҳужумини эскалация қилувчи ва қабул қилиб бўлмас деб атади. Германия ҳукуматида Москва ўйлаб топилган баҳоналардан фойдаланиб, можарони янада кескинлаштираётгани айтилди.

Фото: Russian Defence Ministry/Handout/SNA/IMAGO

Буюк Британия, Франция ва Германиянинг сиёсий етакчилари Россиянинг Украинага янги ўрта масофали “Орешник” ракетаcини қўллаб берган зарбасини қоралади. Бу ҳақда жума куни, 9 январда ГФР канцлери Фридрих Мерц, Франция президенти Эммануэл Макрон ва Буюк Британия бош вазири Кир Стармер ўртасидаги телефон суҳбатидан кейин Британия ҳукумати вакили хабар берди. Унинг айтишича, Стармер ҳужумни оқлаш учун Россия “ўйлаб топилган айбловлар”дан фойдаланган, деб ҳисоблайди.

Аввалроқ Германия ҳукумати ҳам Россиянинг “Орешник” ракетаcи қўлланган Украинага зарбасини кескин қоралаган эди. ГФР ҳукумати расмий вакилининг ўринбосари Штеффен Майер Берлинда билдиришича, Россия Лвивдаги Украина фуқаролик энергетика инфратузилмасига ўрта масофали ракета билан зарба бериб, “яна бир бор эскалация йўлини танлади”.

Майер Москва ҳаракатларини “қўрқитиш учун қилинган, аммо мақсадига етмаган рамзий таҳдидлар” деб атади. Унинг таъкидлашича, бу ҳолатда Россиянинг хулқ-атвори “оқ ип билан тикилган” — яъни ишончи кам, сохта тусда.

Штеффен Майернинг сўзларига кўра, Россиянинг “зарба гўё Владимир Путин резиденциясига қилинган ҳужумга жавоб эди” деган баёнотлари тушунарсиз. У бу даъволарни “соф манёвр” деб атаб, ҳужум ҳақидаги айбловлар аллақачон рад этилганини таъкидлади. “Россия ҳеч қандай провокациясиз ҳам эскалацияни давом эттиряпти”, — деди ГФР ҳукумати вакили ўринбосари.

У, шунингдек, ракета сўнгги кунлар ва ҳафталарда Киев, АҚШ ва Европа давлатлари томонидан Украинада тинчликка эришишга қаратилган жадал дипломатик саъй-ҳаракатлар олиб борилаётган бир пайтда учирилганини қайд этди. Майернинг айтишича, бу ҳужум Берлин ва унинг ҳамкорларининг Украинани қўллаб-қувватлаш, унга ҳар томонлама ёрдам беришда давом этиш қатъиятини ўзгартирмайди.

Бундан олдин Россия мудофаа вазирлиги Украинага қарши ўрта масофали “Орешник” ракетаcи қўлланганини маълум қилган эди. Бу — Украинага қарши уруш давомида мазкур турдаги ракета қўлланишининг иккинчи маълум ҳолати. 2024 йил ноябрда Россия армияси “Орешник” билан Днипро шаҳридаги мудофаа корхонасига зарба берган.