Ўзбекистонда лойиҳалаш ва қурилишни параллел олиб бориш амалиёти ўзгаради

Ўзбекистонда 2026 йил 1 июлдан бошлаб янги объектлар бўйича лойиҳалаштириш ва қурилиш-монтаж ишларини бир вақтда амалга ошириш (параллел қурилиш) амалиёти бекор қилинади.

4 июн куни имзоланган 104-сонли президент фармонига кўра, мазкур амалиёт ўрнига тажриба-синов тариқасида босқичма-босқич тайёрланадиган лойиҳа асосида қурилиш-монтаж ишларини амалга ошириш тартиби жорий этилади.

Бу тартиб доирасида:

• тадбиркорлик субъектларининг ўз маблағлари ҳамда жалб қилинадиган тўғридан тўғри хорижий инвестиция маблағлари ҳисобидан молиялаштириладиган объектлар (кўп квартирали уй-жойлар бундан мустасно) бўйича босқичма-босқич тайёрланадиган лойиҳа асосида қурилиш-монтаж ишларини амалга оширишга рухсат берилади;

• қурилиш-монтаж ишлари объектнинг ҳар бир босқичи (қисми) бўйича лойиҳа-смета ҳужжатлари экспертизадан ўтказилгандан ва Қурилиш инспекцияси томонидан рўйхатга олингандан сўнг режа-график асосида бошланади;

• қурилиш-монтаж ишларини белгиланган тартиб-таомилларга мувофиқ олиб бориш жараёнлари Қурилиш инспекцияси томонидан "Қурилишда давлат назорати" электрон платформасида мониторинг қилиб борилади;

• бюджет тизими бюджетлари ҳисобидан молиялаштириладиган объектларда босқичма-босқич тайёрланадиган лойиҳа асосида қурилиш-монтаж ишларини Ўзбекистон Республикаси Президенти ва Вазирлар Маҳкамасининг қарор (фармойиш)лари билан амалга оширишга йўл қўйилади.

Қурилиш вазирлиги Қурилиш инспекцияси билан биргаликда 2027 йил якунига қадар тажриба-синовнинг ижобий натижаларига кўра уни давом эттириш ва бошқа йўналишларда татбиқ этиш юзасидан таклифларни Вазирлар Маҳкамасига киритиши керак.

Шунингдек, “Шаффоф қурилиш” миллий ахборот тизимида пудратчиси аниқланадиган, шунингдек, қиймати базавий ҳисоблаш миқдорининг 25 минг бараваригача (ҳозирда – 10,3 млрд сўм) бўлган объектларнинг давлат харидлари бўйича техник топшириқларини экспертизадан ўтказиш амалиёти бекор қилинади.

Маълумот учун, 2021 йилда кучга кирган Шаҳарсозлик кодексига асосан, молиялаштириш манбаларидан қатъи назар, объектларни шаҳарсозлик ҳужжатларини бир вақтнинг ўзида (параллел равишда) ишлаб чиққан ҳолда қуриш ва реконструкция қилиш тақиқланган.

Шу билан бирга, кодексга кўра, объектларни бир вақтнинг ўзида (параллел равишда) лойиҳалаштирган ҳолда қуриш – мудофаа қобилияти ва давлат хавфсизлигини, аҳолининг ҳаёти ва соғлиғи хавфсизлигини таъминлаш бўйича чора-тадбирлар, табиий ва экологик офатларнинг оқибатларини бартараф этиш, Ўзбекистон Республикасининг халқаро мажбуриятларини бажариш билан боғлиқ истисно ҳолларда, молиялаштириш манбалари мавжуд бўлганда Ўзбекистон Республикаси Президенти ва Ўзбекистон Республикаси Вазирлар Маҳкамасининг қарорларига биноан амалга оширилиши мумкин.