Бу жамоа билан йўлим тугади – Исломбек Исмоилов Ўзбекистон U17 билан хайрлашди

Ўзбекистон U17 терма жамоаси бош мураббийи Исломбек Исмоилов Қатарда ўтказилаётган жаҳон чемпионати 1/8 финалидан ўрин олган Италияга (2:3) қарши ўйиндан кейин мухлисларга мурожаат қилди.

«Бугун биз Жаҳон чемпионатидаги иштирокимизни якунладик. Шу билан бирга, 3 йил давомида юрагим билан хизмат қилган U17 терма жамоамизнинг ҳам фаолияти ниҳоясига етди. Бу йўл мен учун шунчаки иш эмас эди — бу шараф, масъулият ва Аллоҳ берган синов бўлди. Уч йил давомида биз бу жамоа билан машаққатли машғулотлар, қувончли ғалабалар, оғир мағлубиятлар билан ёнма-ён бордик. Яхши кунларда ҳам, ёмон кунларда ҳам бирга эдик», деб ёзди мураббий.

Исломбек Исмоилов шу йилнинг апрель ойида Ўзбекистон U17 терма жамоаси билан Осиё чемпиони бўлганини эслади.

«Осиё чемпионлиги — бу авлоднинг матонати ва меҳнати. 2025 йилда Осиё чемпиони бўлиш — бу болаларимизнинг жасорати, меҳнати ва интилиши. Бу натижа Ўзбекистон футболи тарихига олтин ҳарфлар билан ёзилиб бўлди. Ҳеч қачон унутмайман: ҳар бир машғулотда, ҳар бир турнирда биз Ўзбекистон байроғининг шаънини ҳимоя қилдик. Ҳар бир ўйин олдидан битта фикр бўларди: Бу Ватан учун жон фидо», деб ёзди мураббий.

Унинг таъкидлашича, мураббий сифатида бир нарсага қатъий амал қилди: адолат ва ҳалоллик.

«Ҳеч кимнинг исмини, клубини ёки таниш-билишчилигини эмас, фақат меҳнатини, характерини, муносиблигини танладим. Терма жамоага чақирилган ҳар бир футболчи бунга ҳақли эди. Шу қарорларим учун бугун ҳам, эртага ҳам бошим баланд», деб ёзди мураббий.

Исломбек Исмоилов сўзининг якунида ўзини қўллаб-қувватлаган мухлисларга, ЎФА раҳбариятига, ёрдамчиларига, футболчиларга миннатдорлик билдирди.

«Бу якун — бир эшикнинг ёпилиши эмас. Бу янги босқичнинг бошланиши. Бугун менинг йўлим бу жамоа билан тугади», деб ёзди мураббий.