Россия шаҳарларида яна намойишлар ва қўлга олишлар. ТИВ Вашингтонни айблади

Россия Ташқи ишлар вазирлиги бўлиб ўтаётган намойишларда АҚШни айблаб чиқди. «АҚШ Россия ички ишларига аралашиши интернетда рухсат этилмаган намойишларга чорловчи чақириқларни «айлантириши» билан ҳам исботланди. Бу Россияга қарши режалаштирилган иш эканига шубҳа йўқ. Суверен мамлакатнинг ички ишларига аралашишни тўхтатишларини талаб қилган ҳолда бу учун жавобарлик борлигини эслатамиз», дейилган Россия ТИВ баёнотида.

АҚШнинг Россиядаги элчихонаси намойишлар вақтида кўплаб одамлар қўлга олинаётганидан хавотирда эканини маълум қилиб, Facebook'даги саҳифасида шундай пост қолдирди: «Алексей Навальнийни қўллаб ўтказилаётган намойишларда Россия ҳукумати кўплаб фаоллар ва журналистларни қўлга олди. Россияни инсон ҳуқуқлари талабини бажаришга чақирамиз».

Россия ТИВ бу постга ҳам муносабат билдирди. «Сиз жон куйдириб оқлаётган намойишлар ноқонуний ҳисобланади. Бунақа ишларда Американинг ўзида нима қилишларини биласизми? Одамларга ўқ узишади. Иккиюзламачилик сизнинг ҳаёт тарзингизга айланган, десак бўларкан-да?», дейилган Россия ТИВ изоҳида.

Петербургда намойишчиларга қарши газ ва электрошокерлар қўлланди — шунингдек, табел қурол билан таҳдид қилинган. Намойишчилар йўллар тўсиб қўйилгани туфайли Невский проспектига чиқа олишмаган, аммо улар Ёш томошабинлар театри биноси олдидан шаҳар қонунчилик йиғилиши биносигача марш қилиб боришган. Бу маршрутнинг ўрталарида — Сенной майдонида — полиция кўздан ёш сиздирувчи газ қўллаган. Бунга намойишчилар қўлга олинганлардан бирини полиция қўлидан қайтариб олишга уринганида содир бўлган. «Фонтанка» хабарига кўра, шу ерда полициячилардан бири табел қуролини намойишчиларга ўқталган. Бундан ташқари, полициячилар, Росгвардия ва ОМОН ходимлари одамларни дубинкалар билан калтаклаган. Петербургдаги акцияда жами 800га яқин киши қўлга олинган. Норозилик акцияси бўйича жиноий ишлар очилмоқда — қўлга олинганлардан бири омончилардан бирининг «бош соҳасига икки қўллаб тушириш»да айбланмоқда.

Намойишларда бутун Россия бўйлаб 4 мингдан ортиқ фуқаролар қўлга олинган. Улардан 82 нафари журналист экани маълум. Ижтимоий тармоқларда ОМОН одамларни қўлга олаётгани тасвирланган видеолар тарқалди. Суратлардан бирида намойишчиларни олиб кетган автобусда қон излари кўринган. Қўлга олишлар давомида ҳатто намойишларда қатнашмаганлар ҳам автобусларга тиқиб олиб кетилган.

Алексей Навальнийнинг хотини Юлия ҳам намойишлар чоғида қўлга олиниб, бошқармага олиб кетилган.

Россия вақти билан соат 18:00да Петербургда намойишлар тўхтагани эълон қилинди. Бу вақтга келиб Москвадаги намойишлар сабаб ёпилган 11та метро станцияси ҳам очилди. Хусусан, Кремль яқинидаги бекатлар ҳам ёпилганди ва улар Москва вақти билан соат 18:00дан фаолиятини тиклади.

Москва милицияси вакиллари «Матросская тишина» тергов ҳибсхонаси олдини айниқса жиддий қўриқлашди. Чунки у ерда Алексей Навальний сақланмоқда. Ҳибсхона яқинида кўплаб намойишчилар қўлга олинган. Намойишчилар ОМОН зобитларига «Биз душман эмасмиз» деб бақиришди.

Маълумот учун, россияликлар 17 январ куни қўлга олинган мухолиф сиёсатчи Алексей Навальнийни қўллаб иккинчи марта кўчаларга чиқишди. Навальний 20 августда заҳарланиш ташхиси билан касалхонага тушгач, 22 август куни Берлинга даволаниш учун олиб кетилганди. У 7 сентябргача кома ҳолатида бўлди. Навальний ўзини заҳарлашни Россия ҳукумати буюртма қилгани ва заҳарлаш учун «Новичок» оғуси ишлатилганини айтади. Сиёсатчи Россияга қайтиши билан қўлга олинди.

Навальний қўлга олингач, унинг Владимир Путиннинг 1 миллиард долларлик саройи борлиги ҳақида суриштируви эълон қилинди. Суриштирув жуда катта шов-шувларга сабаб бўлди ва Путин бу саройни ҳеч қачон кўрмаганини айтди. Кейинроқ Владимир Путиннинг яқин дўсти экани айтиладиган Аркадий Ротенберг сарой ўзига тегишли эканини «ортиқ сир тутмоқчи эмаслигини» айтиб, баёнот берди.