Mercedes ҳарбий техника ишлаб чиқаришни бошлаши мумкин

Германиянинг Mercedes-Benz автоконцерни глобал хавфсизлик таҳдидлари фонида ҳарбий техника ишлаб чиқаришни йўлга қўйиши мумкин. Бу ҳақда компания бош директори Ола Каллениус The Wall Street Journal газетасига берган интервьюсида маълум қилди.

Фото: AP

Унинг сўзларига кўра, дунё тобора ноаниқ ва хавфли ҳудудга айланиб бормоқда. “Менимча, Европа ўзининг мудофаа салоҳиятини кучайтириши кераклиги аниқ. Агар биз бу жараёнда ижобий роль ўйнай олсак, бунга тайёрмиз”, — деди Каллениус.

Топ-менежернинг таъкидлашича, компаниянинг қурол-яроғ соҳасига кириши фақат иқтисодий жиҳатдан мақбул бўлган тақдирдагина амалга оширилиши мумкин.

Шу билан бирга, у эҳтимолий мудофаа бизнеси концерн фаолиятининг фақат “жуда кичик қисми”ни ташкил этишини, асосий маҳсулот эса фуқаролик автомобиллари бўлиб қолишини айтди. Бироқ Каллениус фикрича, айнан мудофаа соҳаси келажакда ўсиб борадиган йўналишга айланиши мумкин.

Аввалроқ Financial Times нашри Германиянинг яна бир автоконцерни — Volkswagen Исроилнинг Rafael Advanced Defense Systems компанияси билан ҳамкорлик бўйича музокаралар олиб бораётгани ҳақида хабар берган эди.

Маълумотларга кўра, томонлар Volkswagen’нинг Оснабрюкдаги қийин аҳволда қолган заводини Исроилнинг “Темир гумбаз” ракетага қарши мудофаа тизими учун компонентлар ишлаб чиқаришга мослаштириш имкониятини муҳокама қилмоқда.

Бироқ Volkswagen вакили DW’га берган изоҳида компания қурол ишлаб чиқаришни режалаштирмаётганини таъкидлаган. Шу билан бирга, 2027 йилда мазкур заводда ишлаб чиқариш якунланиши режалаштирилгани боис, компания турли бозор иштирокчилари билан истиқболли вариантларни муҳокама қилишда давом этаётгани билдирилган.