Хитойлик 4 йил юрагида тиш кавлагич билан яшади

Фото: iStock

Хитойда шифокорлар бемор эркакнинг юрагидан узунлиги 6 сантиметр келувчи тиш кавлагични чиқариб олишди. Аниқланишича, 29 ёшли Чжоу фамилияли эркак тиш кавлагични 4 йил аввал тасодифан ютиб юборган.

Эркак юқори тана ҳарорати ва кўкрак соҳасидаги кучли оғриқдан шикоятлар билан шифохонага етказилган. Шифокорлар унда юрак яллиғланиши ва ўпкада соя борлиги ташхисини қўйишган ҳамда юракнинг ўнг бўлмасидаги ўсимтада ингичка буюмни аниқлашган.

Аниқланишича, Чжоу улфатчиликлар вақтида спиртли ичимлик солинган бокалини тиш кавлагич билан белгилашни одат қилган. Бу эса кунлардан бирида унинг тиш кавлагични ичимлик билан ютиб юбориши ва унинг нафас йўлларига тушиб, сўнгра ўпкани тешиб юракка санчилишига олиб келган.

Чжоу шундан кейин ўпка яллиғланиши ва юқори тана ҳароратидан мунтазам азият чекиб келган, бироқ шифокорлар бунинг сабабини аниқлай олишмаган. Таъкидланишича, эркак даволаниш учун 200 минг юандан кўпроқ маблағ сарфлаган.