Қорақалпоғистонда тўртта янги шифохона ташкил этилади. Соғлиқни сақлаш вазирининг Оролбўйи минтақасида тиббий хизмат бўйича ўринбосари лавозими жорий этилди.
Фото: Kun.uz
Ўзбекистон президенти “Қорақалпоғистон Республикасида 2022–2024 йилларда аҳоли саломатлигини муҳофаза қилишни янада кучайтириш тўғрисида” қарор имзолади.
“Нигоҳ” Telegram-канали хабарига кўра, қарорга асосан Қорақалпоғистонда қуйидагилар ташкил этилади:
- сурункали касаллиги ва ногиронлиги мавжуд бўлган болалар учун 120 ўринли Болалар тиббий реабилитация маркази;
- 80 ўринли Болалар фтизиатрия санаторийси;
- Нукус шаҳар тиббиёт бирлашмаси таркибида 20 ўринли хирургия бўлими;
- Қорақалпоғистон Республикаси кўп тармоқли тиббиёт марказининг хирургия бўлими негизида академик В. Воҳидов номидаги Республика ихтисослаштирилган хирургия илмий-амалий тиббиёт марказининг Нукус филиали;
- Нукус шаҳар тиббиёт бирлашмаси таркибида мавжуд ўринлар доирасида умидсиз оғир беморлар учун 20 ўринли паллиатив ёрдам кўрсатадиган бўлим (ҳоспис).
Шунингдек, соғлиқни сақлаш вазирининг Оролбўйи минтақасида тиббий хизмат бўйича ўринбосари лавозими жорий этилди.
2022 йил 1 июлдан лепрозорийларда ишлайдиган барча ходимларнинг лавозим маошига 50 фоиз миқдорида устама белгиланади.
Эслатиб ўтамиз, президент шу ҳафта Нукусда технопарк ташкил этилиши бўйича ҳам қарор имзолади.
