Жиззахда ҳакерлар фуқаронинг банкка қўйган катта миқдордаги омонатини ўғирлади

Омонат Асакабанкнинг Жиззах вилояти филиалига қўйилган. Киберҳужум оқибатида банкнинг мобил иловаси орқали фуқаро номига расмийлаштирилган омонат ҳисоб рақамидан 3 млрд сўмга яқин пул маблағи ечиб олинган. Омонат эгаси бу ишда банк ходимларини, банк ходимлари эса унинг ўзини айбламоқда.

Фото: REUTERS

Жиззахда фуқаро томонидан Асакабанк Жиззах вилояти филиалига омонатга қўйилган катта миқдордаги маблағ киберҳужум оқибатида ўғирланди. Бу ҳақда Kun.uz манбаси хабар берди.

Маълум бўлишича, 2023 йил 19 декабр куни фуқаро ва Асакабанк Жиззах вилояти филиали ўртасида омонат шартномаси тузилган. Унга кўра, фуқаро банкка 210 минг АҚШ доллари миқдоридаги пулларини омонатга қўйган.

Киберҳужум 2025 йил 26 май куни уюштирилган: Asakabank мобил иловаси орқали омонатчининг номига расмийлаштирилган “On-line uzs mobile” омонат ҳисоб рақамидан 3 млрд сўмга яқин пул номаълум шахслар томонидан яширин равишда ечиб олинган.

Ҳолат бўйича Kun.uz'га келиб тушган ҳужжатларда кўринишича, фуқаро банк омонат шартномаси бўйича ўз мажбуриятларини бажармаётганини билдириб, бу ишда банк ходимларининг ўзини айбламоқда. Яъни мижоз Асакабанкнинг Жиззах филиали ходимлари унинг номидан сохта банк омонати шартномаларини тузиб, ҳисоб варақларидаги пулларни растрата қилиш йўли билан ўзлаштиришган, деб ҳисобламоқда.

Банк ходимлари эса омонат пулларининг киберҳужум орқали ечиб олинишига мижознинг мобил телефонига вирус орқали АРК файли ўрнатилганини сабаб қилиб кўрсатишган. Бунга жавобан омонатчи пуллар унинг эмас, банкнинг икки босқичли парол билан ҳимояланган ҳисоб рақамидан ечиб олинганини билдирган.

Ҳолат юзасидан Жиззах вилояти ИИБ ҳузуридаги Тергов бошқармаси томонидан Жиноят кодексининг 169-моддаси (Ўғрилик) 3-қисми “б,в” бандлари билан номаълум шахсларга жиноят иши қўзғатилган. Ҳозирда тергов ҳаракатлари олиб борилмоқда.

Муаллиф: Руслан Сабуров

#Жиззах #банк #ҳакер